СВО-ну ветеранларына бла аланы юйюрлерине себеплик амалла

Бу кюнледе КъМР-де Энчи аскер операциягъа къатышханланы ветеранлары эмда аланы юйюрлери бла ишлеген социал службаланы бла организацияланы къуллукъчуларына семинар ётгенди. Тюбешиуню РФ-ни Президентини СКФО-да толу эркинликли келечисини аппараты Къабарты-Малкъарны Правительствосуну болушлугъу бла Россейни «Билим» биригиую къурагъанды.  Ары республиканы муниципалитетлеринден 150 специалист къатышханды.

Келгенлеге алгъышлау  сёзню КъМР-ни жарыкъландырыу эмда илму министрини орунбасары Мокъаланы Ачемез айтханды. Ол аскерчилени юйюрлерине билим бериуню жанындан болушлукъ бериуге артыкъда эс бургъанды.

«Бизни устазларыбыз, школ эмда студент психологларыбыз кюн сайын жигитлени сабийлери бла юй бийчелерине жумушакъ эмда профессионал болушлукъ этедиле. Россейни «Билим» биригиуюню республикада быллай уллу семинар бардырыргъа башламчылыгъы бек магъаналыды. Биз билим бериу бла чекленмей, сынауладан ётгенле бла тийишли байламлыкъланы къураргъа керекбиз. Бюгюн алыннган сынамны бизни ишчилерибизге бютюнда хайырлы эм тюз ишлерге болушурукъларына ийнанама», - деген Мокъаланы Ачемез.

Жыйылгъанланы  аллында «Билим» биригиуню баш лекторлары чыкъгъандыла: клиника психолог, полиграфолог, профайлер Юлия Елизарова эмда Адаптив интеллект институтну къурагъан, психология илмуланы кандидаты Валерий Гут. Дагъыда РФ-ни психология-педагогика болушлугъун айнытыуну жалчытхан Федерал координация араны келечилери: Россейни билим бериу академияны корреспонденти, Миллет тинтиу университетни «Экономиканы бийик школу» психология департаментини профессору Ольга Ульянина эм клиника психолог Анна Ермолаева.

«Ветеранланы юсюнден айтсакъ, ангыларгъа керекди: бизни аллыбызда жаланда аскер сынамлары болгъан адамла тюйюлдю. Ала  бек уллу тюрлениуледен ётген адамладыла - дунияда кесини жерин жангыдан излеген инсанла. Хар бирини къатында уа аны юйюрю: юй бийчеси, сабийлери, ата-аналары, ала да бу кёрюнмеген къаугъагъа къатышхандыла. Ала да ол заманны ичинде сакълап, къайгъы этип, айла бла алай жашаргъа юйрене эдиле, энди уа жангыдан бирге болургъа юйренедиле. Къыйын заманлада ол инсанлагъа эм аланы жууукъларына, аланы «диагнозларына» бла «кризис болумларына» къарамай, бизни, усталача, борчубуз алагъа болушургъады», - дегенди Ольга Ульянина.

Тюбешиуге къатышханлагъа лекцияла, тренингле, мастер-классла эм иш оюнла къурагъандыла.

Семинаргъа социал къоруулау органланы, муниципал къуралыуланы, аскер комиссариатланы, «Ата журтну къоруулаучулары» фондну бёлюмлерини, Ата журтну аскерчилерини юйдегилерини комитетини, ветеран организацияланы, иш бла жалчытыу араланы, МФЦ бла билим бериу учрежденияланы башчылары бла специалистлери къошулгъандыла. Дагъыда «Молодая Гвардия Единой России» бирлешлени Къабарты-Малкъарда регион бёлюмюню волонтёрлары тюбешиуню къурагъан организацияладан бири болгъанды.

Бу ишле Билим.Къырал жарыкъландырыу проектни чеклеринде къуралгъандыла. Ала къырал къуллукъчуланы Россейни тарыхыны, маданиятыны эмда экономикасыны, СВО-ну борчларыны эм геополитиканы юсюнден хапарларын ёсдюрюуге аталгъанды. Проектни эм Биригиуню башха башламчылыкъларыны юсюнден толу хапарны «Билим» биригиуню сайтында табаргъа боллукъду, деп айтылынады «Билим» биригиуню билдириуюнде.