Республикада бола тургъан ишле

Герпегежде - жангы кёпюр 

Бу элни ичинде эски кёпюр быйыл жаз башында суу къутуруп бузулгъандан сора аны чачып, жангысын сюерге оноу этилген эди. Кёп да бармай ишле анда къыстау башланнгандыла, къурулушчула хар чууакъ кюнню хайырланып, шёндю аны мурдорун бетондан бла темирден жарашдыра турадыла.

Жангы кёпюр алгъыннгыдан къайда тынгылы боллукъду: узунлугъу – 21, эни уа 12 метрге жетерикди. Ол ортасында чыпынлары болмай Хеу сууну эки жагъасына таянырыкъды. Къутуруп келген черек, жауунла да тозуратмазча, аны жанларын бетон бла кючлендирликдиле. Ол ишленнгенден сора, аны юсюне эмда ол экиге бёлген Холам орамны битеу узунлугъунда асфальт жайыллыкъды.

Кёпюрню къурулушу «Къабарты-Малкъар Республиканы транспорт инфраструктурасын хар жаны бла айнытыу» программаны чеклеринде бардырылады, ахчаны анга республиканы Жол фондундан бёлгендиле.

Нартюхню оруу башланнганды

Жерчиликде къармашханла алгъаракъда мирзеулюк нартюхню оруп башлагъандыла. Республиканы Эл мюлк министерствосунда айтханларына кёре, бу кюнлеге кёп къалмай 11 минг гектардан 71 мингден артыкъ тонна нартюх жыйылгъанды. Аны тирликлилиги былтырдан эсе игирекди: орта эсеп бла тергегенде бир гектардан 68 центнер чыкъгъанды. Саулай айтханда уа, быйыл мирзеулюк нартюх 117 минг гектарда ёседи.

КъМР-ни предпринимательлери айырмалыланы санында

Бу кюнледе Москвада «Жылны экспортёру» битеуроссей премияны Шимал Кавказда бардырылгъан кезиуюнде хорлагъанланы саугъалагъандыла. Аланы санында Къабарты-Малкъардан юч предприятие да барды, деп билдиргендиле республиканы Экономиканы айнытыу министерствосундан.

Алай бла конкурсну «Аш-азыкъла» бёлюмюнде биринчи жерни «Аква-Кристалл» биригиу алгъанды, «IT-де бийик технологияла» номинацияда уа «Корпорация ДНК» ООО алчы болгъанды. «Промышленность» жаны бла ючюнчю жерге уа «Садкомплект» предприятие чыкъгъанды.