Эллилерине сакъ кёзден къарайдыла

Жангы Малкъарда социал магъаналы объектлени ишленнгенлери, жангыртылгъанлары эм   жууукъ заманда къурулушлары башланырча проектде болгъанлары да бизни къууандыргъанды. Ала элни ара орамында орналгъанлары себепли, кёзге илинмей къалмайдыла. Болсада, ала хайырланыргъа берилгинчи, эски мекямлада ишлерге тюшеди. Элни амбулаториясы да аладан бириди. 

Биз аны ишини юсюнден толуракъ хапар билир хыйсапдан ары баргъаныбызда, баш врач Мурзабекланы Любовь солургъа кетип тургъанын билдик. Болсада участканы медсестрасы Мирзоланы Зурият, Отарланы Рамазанны къызы, бизге жарыкъ тюбеп, ушакъ этерге заман тапханына ыразы болдукъ. 

Зурият Нальчикде медицина училищени бошагъандан сора, урунуу жолун Нальчикни 1-чи номерли сабий поликлиникасында башлагъанды. Анда эки жыл чакълы ишлеп тургъанлай, атасы ёлюп, анасы бла юйде турургъа туугъан эли Жангы Малкъаргъа къайтады. Алай бла 1988 жылдан бери медсестра болуп, мында амбулаторияда урунады. 

Эртте эски амбулатория почтаны юйюнде жаланда эки отоуда орналгъанды. Садикни школгъа кёчюргенлеринден сора, аны амбулаториягъа бергендиле. Аны тышы артыкъ омакъ тюйюл эсе да, ичине кирсенг, сюртюлюп-боялыпды эмда болмагъанча тазады. Болсада ол бюгюннгю излемлеге артыкъ келишмегени ючюн, жууукъ заманда  былайда жангы мардалагъа кёре этилген учрежденияны къурулушу башланырыкъды. 
Зурият айтханнга кёре, бусагъатда алада абаданладан 857-си эм сабийледен да  236-сы  эсепде турадыла. Жарсыугъа, аланы араларында къыйын ауругъанла да бардыла. 

- Мен келгенде, элде диабетден бла онкологиядан ауругъан жаланда эки адам бар эди. Бусагъатда уа онючюсю онкологиялары эм жыйырма тёртюсю да диабетлери болгъанладыла. Андан сора да, алтмыш юч сакъат барды, ол санда беш сабий.  Алагъа тынгылы къаралырча  эсепде турадыла, жылдан эки кере стационаргъа жатып, саулукъларына бакъдырадыла. Энчи бир тюрлю  тынгылы къаратыргъа керек болса, район аралы поликлиникагъа жиберебиз,- дейди Зурият.

Диспансеризацияны юсюнден айтханда, эки жыйырма жылдан таматала – жыл сайын, андан гитчеле уа юч жылгъа бир кере саулукъларына къаратыргъа борчлудула. Аллай амалны хайыры бла кёп къыйын ауруу башлана тургъан кезиулеринде ачыкъланадыла, ол санда онкология да. 

- Анализлерин жаратмасакъ, башха специалистле толуракъ тинтирча ара больницагъа жиберебиз. Анда тийишли специалистледен сора да, шёндюгю оборудование да барды. Жылгъа бир кере жай кезиуледе улоуну мурдорунда ишлеген флюорография келеди. Бизнича узакъ элге ол да ахшы себепликди, - дейди ушакъ нёгерибиз.

Зурият, бирси элледеча, мында да, саусузланы асламысыны къан басымлары кётюрюлюп, жюреклери бла къан тамырлары, бауурлары, бюйреклери, бронхалары, ёпкелери ауругъанларын айтады. Алагъа эмда башхалагъа да амбулаторияда биринчи болушлукъ бериледи. Керек болса уа, УЗИ-ге, тюрлю-тюрлю рентгеннге да район аралы больницагъа ашырыладыла. Стационарда кюндюз саусузлагъа багъарча юч жатар жер барды. Мында терапевт, фельдшер ишлейди эм процедурала этген кабинет да барды. 

Медицина учреждение жетишимли ишлерча, аны таматасы врач-нефролог Мурзабекланы Любовь уллу къыйын салгъанды. Ол Нальчикде ишлеп тургъанлай, 2010 жылда туугъан элине къайтып, амбулаториягъа башчылыкъ этгенди. Аны бла бирге юйюр врачны борчун да сылтаусуз толтурады. 

- Бюгюнлюкде ишибизге чырмагъан бир тюрлю жарсыу жокъду. Кесигиз кёргенча, мекям эски болгъанлыкъгъа, тазалыкъ сакъланырча, къууатлыкъ болурча къолубуздан келгенни аямай кюрешебиз. Бизге элден къолайлары болгъан жашла да болушадыла. Ол санда Князланы Расул бла Къазийланы Мухарбек терезелени жангыртыргъа, холодильник алыргъа эм башха жумушланы тамамларгъа да себеплик этгендиле. Болсада сакъ жауунланы кезиуюнде юйню башындан  суу ётюп,  кабинетлеге саркъады.

Бусагъатда амбулаторияда баш врач Мурзабеклены Любовь, фельдшер Къабардокъланы Халимат, процедурала этген медсестра Хочуланы Фаризат, водитель Отарланы Рамазан тазалыкъгъа къарагъан Къудайланы Лейля ишлейбиз.  Юч жыл мындан алгъа женгил машина бергендиле. Бизге ол бек жарап турады. Районла аралы больница дарманла эмда башха затла бла да толу жалчытады. Керек болгъан сагъатда терк болушлукъ берген машинаны Урожайное элден чакъырабыз, больницагъа неда Нальчикге тапдырыргъа керекли саусузларыбыз кёп болмагъаны себепли, ол эки элге да жетишип турады, - деп къошханды специалист.

Биз Зуриятха юйюрюню юсюнден да сормай болмагъанбыз. Юй таматасы Мирзоланы Азрет бла эки сабий ёсдюргендиле, экисине да бийик билим алдыргъандыла. Хасан Звездный шахарчыкъда къуллукъ этеди, энчи аскер операциягъа къатышханды, бюгюнлюкде эки къызы барды. Жансурат да эрдеди, юйде къызчыгъына къарайды.