«Къолумдан келип, болушлугъум изленнген бир адамны жууапсыз къоймагъанма»

Тотрукъланы Тахирни къызы Сотталаны Зульфия бла эрттеден шагъырейме. Жыйырма беш жыл мындан алгъа ол Аллергоцентрде медсестра болуп, эсимде ишинде жууаплылыгъы, болушлукъ этерге итиниую бла къалгъанды. Жан аурута билиую, аурууунгу селейтирге излегени да аны медицинаны бошдан сайламагъанын кёргюзтген шартладыла. Бусагъатда Зульфия Медико-социал экспертизаны врачыды.

Сабийлигинден атасындан ёксюз къалгъанды. Тотрукъланы Тахир жашауун билим бериу бла байлагъанды. Кеси да КъМКъУ-ну филология бёлюмюн бошап, туугъан эли Хабазгъа къайтып, сабийлени орус тилден бла адабиятдан окъутханды. Ол кезиуде юйретиу жаны бла таматаны орунбасары болуп да ишлегенди. Ызы бла аны Кичибалыкъ элни орта школуну таматасы этип салгъандыла. Намысы, даражасы жюрюген билимли атасын, жарсыугъа, Зульфия эсгералмайды. Ол авариягъа тюшюп, ажымлы ёлгенинде анга жаланда эки жыл бла тогъуз ай бола эди. 

- Кесими танып башлагъанымы эсгерсем, къуруда атамы излей эдим. Манга уа абаданла аны Москвагъа кетгенин, кёп саугъала алып келлигин айта эдиле. Сабий эсими алай уютсала да, кеслери уа атамы жиляуун этгенлери эсимдеди. Сора ангылатдыла аны къайтмазлыгъын, алай ол энди кёкден мени хар хатадан бла палахдан сакъларыгъын да, -деп эсгереди Зульфия сабий жылларын.

Алай бла анасы Галина къолунда бири биринден гитче юч къыз сабийи бла кеси къалгъанды. Ол да устаз болуп кёп жылланы Хабазны школунда ишлегенди. Аны себепли жигитими юйюрюнде билим эм багъалы, керекли байлыкъгъа саналгъанды. Устазланы юйюрюнде жаланда эм гитчелери Зульфия врачлыкъны сайлагъанды. Къалгъанла аталарыны бла аналарыны жолунда барадыла.

Зульфия школда окъугъан заманда, аммасыны аягъында тамырлары ауруп, жара болуп, арталлыда жюрюялмай къалгъан эди. Кюн сайын аны жараларын жангыдан тазалап, байлауларын алышыу да къызчыкъны борчу болады. Ким биледи, жюреги ариу туудукъчугъуна бегирекми тарта болур эди, байлауларын жаланда Зульфия алышса сюйгенди аммасы. Байлаулагъа узалгъанын жаратып, аны къолу ушагъанын эслеп, врач болурун да ол тилеген эди. 

Алай бла къыз Хабазны орта школунда бек иги окъугъанды. Бегирег а математиканы бла орус адабиятны сюе эди, назмула да жазгъанды. Школдан сора медицина колледжге кирип, аны да айырмалы тауусханды. Республикалы больницада анестезиологну болушлукъчусу болуп, операцияла этген бёлюмде тёрт жыл ишлегенди. Ол кезиуде аны биргесине ата жанындан жууугъу Солтанланы Хызыр анестезиолог болуп ишлей эди да, ол аны усталыгъыны кёп тасхаларына юйретгенди. Хызыр бюгюн да анга юлгю болгъанын ёхтемленип айтады мени жигитим. Солтан улу ата эгечинден бийик билим алырын тилегенди. Баям, ол къызны фахмусун эслей болур эди иш юсюнде. 

Алай бла Зульфия КъМКъУ-ну медицина факультетине киреди. Кечеле бла Аллергоцентрде медсестралыкъны бардыра, кюндюз а, окъууун жалчыта, алты жылдан университетни бошап, ординатурада окъуй тургъанлай, аны Медико-социал экспертизагъа, жамауат анга ВТЭК дейди, ишлерге чакъырадыла. Андан бери Зульфия анда эксперт болуп оналты жылны ишлеп келеди.  

- Мени оюмума кёре, врачлыкъ ол бек керекли, магъаналы усталыкъды. Кесими юсюмден айтханда, къолумдан келип, болушлугъум изленнген бир адамны жууапсыз къоймагъанма. Миллетинги атын не жаны бла да кётюрюрге кюрешиуню тюзге санайма, -дейди ол ушагъыбызда.

Зульфияны жетишими жаланда усталыгъы бла чекленип къалмайды. Энчи жашауунда да насыплыды ол. Сотталаны Кемал бла юйюр къурап, эки къызчыкъ ёсдюредиле. Алагъа да адамлыкъны, тюзлюкню, кертичиликни ышанларын сингдире, ийманлыла болургъа, таза ниетлерин сакъларгъа юйретедиле. Насыплыды аллай тиширыу – ишинде намысы-сыйы болгъан, юйюнде уа адеп-къылыкъ жюрюген.