Чыгъармачылыкъ экономиканы айнытыу жоллары белгиленнгендиле

Россей Федерацияны Правительствосу креатив экономиканы айнытыу жаны Стратегияны къабыл этгенди. Аны болжалы 2036 жыл бла чекленеди. Ол къыралны бар субъектлерине кёрюмдюлени тохташдырады, чыгъармачылыкъ бёлюмлеге не жаны бла себеплик этиллигин эмда аланы айнытыу амалларын туура этеди, деп билдиргендиле КъМР-ни Экономиканы айнытыу министерствосундан.

Стратегияда белгиленнгенича, быллай экономика къыралны битеулю продуктунда (ВВП) былтыр 4,2 процентни алгъан эсе, 2036 жылда аны 7,7 процентге жетдирирге керекди. Сора креатив индустрияланы экспортха къошумчулукълары эки кереге, анда къармашхан компанияланы эмда энчи предпринимательлени саны уа тёртден бирине кёбюрек болургъа тийишлиди.

Быллай индустриягъа себеплик этиу амалланы эм азындан 45 субъектде тамамларгъа умутла бардыла. Ол санда креатив кластерле да къураргъа дейдиле.

Къабарты-Малкъаргъа бу Стратегиягъа къатышыу къошакъ онгла береди. Нек дегенде бизни регион миллет эмда жер-жерли маданият энчиликледен байды – къолдан усталыкъла, аш-азыкъла, тийреле – ала бары да креатив бёлюмню айнытыу мурдорудула.

Стратегиягъа тийишлиликде быллай индустриялагъа ахча, мюлк, билим эмда консультацияла бла билеклик этилликди. Предпринимательлени промышленность, бизнес эмда техно паркла къурау жаны бла проектлерине себеплик этерча регионла къыралдан ахча алаллыкъдыла.

Шёндюгю борчла: регионланы креатив индустриялада ишлеген гитче эмда орта предпринимательствону онгдуруу амалларын тинтиу, себеплик этген инфраструктура къурауну сагъышын этиу, республикада быллай бёлюмледе къармашханланы тизмесин жарашдырыу.

Креатив экономиканы эмда туризмни бирге айнытыугъа энчи магъана бериледи. Сёз мында аш-азыкъ этиуню, миллет усталыкъланы, жер-жерли брендлени эмда маркетинг жумушланы юсюнден барады. Туризм жаны бла иги кесек онглары болгъан Къабарты-Малкъаргъа ол да бек магъаналыды.