Алмаланы жыйып башлагъандыла

Къабарты-Малкъарны терек бахчаларында эртте бишген алманы бла кертмени жыйып башлагъандыла. Ала, кёп заманны сакъланыргъа жарамагъанлары ючюн, тюзюнлей тюкенлеге жибериледиле. Къышха асыраргъа жарарчаларын а сентябрьни ахырында жыйып башларыкъдыла.
Аллай  ишле Басхан районну Кишпек элинде да барадыла. Уллулугъу 20 гектаргъа жетген мюлкде эрттенликден ингирге дери уллу, гитче да, бирлешип, «Гала» бла «Ред Чиф» сортладан жюзле бла пластик орунланы толтуруп, айырыргъа ашырадыла. Быйыл иги  хауа болум бай эм тынгылы тирлик алыргъа  онг бергенди. Болсада анга, табийгъатны кючюнден сора да, арт жыллада кезиулю ишлени болжалдан кеч къалмай тамамланнганлары, жангы технологияла эм тынгылы материалла да хайырланнганлары ахшы себеплик этедиле.  
Быйыл Басхан районда алма 500 гектарда ёседи. Тирликни асламысы къышха асыраргъа жарагъан сортладыла. Ол себепден алгъа жетгенлени жыйып бошагъанлай, «Гренни Смит» сортну эм башхаларыны кезиулери да жетерикди. 
Эсге сала айтсакъ, бюгюнлюкде республикада алма терек бахчала 29,7 минг гектардан аслам жерни аладыла. Былтыр жемишден бла наныкъдан 1,1 миллион тонна жыйылгъанды. Ол буруннгу жыл бла тенглешдиргенде, 7,4 процентге кёпдю. Алай бла арт заманда  регион импортну алышындырыу программагъа кёре жемиш-наныкъ продукция бла башха субъектлени да жалчытады. Жыл сайын терек бахчалагъа къошула барады. Аны бла бирге алмаланы сакъларча энчи комплексле да ишленедиле.