Татыулу, жарыкъ да байрам

Озгъан солуу кюнледе Нальчикде Келишиулюкню майданында «Россейни татыулары» деген аш-азыкъ фестиваль бардырылгъанды. Анга келгенле, тюрлю-тюрлю ашланы татыуларын кёргенден сора да, къолдан устала этген затлагъа къараргъа, жырчылагъа тынгыларгъа, саулай айтханда, заманларын зауукълу ётдюрюрге онг тапхандыла.

Бу фестиваль былтыр къуралгъанды, кеси да биринчи кере Татарстанда, ызы бла быйыл алгъаракъда  Смоленскде ётгенди. Энди уа аны кезиую Къабарты-Малкъаргъа жетгенди. Алай бла бизни республика эки кюннге уллу Россейни миллетлерини ашарыкълары бир жерде тюбеген, аланы татыуларын кёрюрге жарагъан даражагъа тийишли болгъанды.

Фестивальгъа саулай Россейден къыркъдан артыкъ регионну келечилери къатышхандыла. КъМР-ни Башчысы Казбек Коков майданнга жыйылгъанлагъа салам берип, эл мюлк бёлюмню жетишимли къармашыууну хайырындан къыралны аш-азыкъ жаны бла къоркъуусузлугъу жалчытылыннганын, быллай аламат жумушла тындырыргъа онг болгъанын да белгилегенди. Жерлешлеге, тышындан келген къонакълагъа бу эки кюн жарыкъ, сейир болурун, сора саулукъ эмда мамырлыкъ тежегенди.

Аны сёзлерине РФ-ни эл мюлк министрини орунбасары Ксения Шевёлкина да къошулгъанды. «Къонакъбайлыкъ этгенигиз ючюн сау болугъуз. Эл мюлк товарла чыгъарыучулагъа болушуп тургъаныгъызны белгилеп, ыразылыгъымы билдирирге сюеме. Сора Къабарты-Малкъар Республика алгъаракъда кесини къыраллыгъын белгилеген эди да, аны бла да жюрегимден алгъышлайма», - дегенди ол.
Аны бла фестиваль ачылгъаннга саналгъанды, къырал оноучула башха къонакъла бла бирге майданда болгъан затлагъа къараргъа атланнгандыла.

Анда уа кёз илинмезлик зат жокъ эди. Бирси регионладан келгенле кеслери жерлеринде битген кёгетледен, наныкъладан эмда жемишледен жарашдырылгъан ашларын, сууларын, сора къалачларын, конфетлерин, кырдык чайларын, бишлакъларын эм кёп башха затларын кёргюзтгендиле. Республиканы Башчысы, Правительствону келечилери эмда къонакъла бла бирге, ашыкъмай, хар регионну юйчюгюню аллына барып, аланы келечилери бла ушакъ эте, ашларыны татыуларын кёре, суратха да тюше, тёгерекге къарап чыкъгъандыла. Сора энчи бу фестивальгъа деп этилген халыуадан да къабып кёргендиле. Аны уа Терк районну усталары хазырлагъан эдиле. Ауурлугъу 254 килограмм тартхан татлы ашарыкъ Россейни рекордларыны китабына тюшгенди.

Аш-азыкъ программаны баш жумушу «Чабан» брендни атындан бардырылгъан мастер-класс болгъанды, аны кезиуюнде Кулинарланы Шимал Кавказда ассоциациясыны башчысы, шеф-повар Чеченланы Бисо таулу хычинле этерге юйретген эди. Анга къараргъа, айтханына тынгыларгъа кёпле жыйылгъан эдиле алайгъа.

Майданны тёгерегин арт-базаргъа бёлген эдиле. Анда къарарча, сатып алырча къадар зат болгъанды: мияладан эмда агъачдан адырла, чёмючле, дагъыда къошундан, кюмюшден, янтарьдан абериле. Къол бла эшилген илляула бла гинжиле уа… сабийлеге анда керти да зауукълукъ болгъанды. Арт-базарда сатыу этгенлени санында къоншу регионладан келгенле да бар эдиле. Айтханларына кёре, бирлери бизни республикада быллай жумушлагъа терк-терк къатыша туруучудула.

Жамауат байрамлада сабийлеге энчи эс бурулгъаны да игиди. Гитче къонакъланы бирлери агъач аякълагъа ёрлеген клоунланы тёгереклеринде басынып ойнай эдиле. Башхаларына уа майданны бир мюйюшюнде мастер-классла бардыргъандыла. Сабий къауум алада къоллары бла абериле ишлерге, къалачланы жасаргъа юйрене, зауукълукъ алгъандыла.

Фестивальны маданият кесеги да бай болгъанды. Сахнагъа чыкъгъан жырчыла, тепсеу къауумла да концерт бардыргъандыла. Сау эки кюнню анда макъамла согъуп тургъандыла.
Байрамны къурагъанла, бир къонакъ да ары келгенине чогъож болуп кетмезча, хар кимни да кёлюн кётюрюрге кюрешгендиле. Гастрофестиваль бардырылгъан кюнле аны кесича чууакъ эмда жылы болгъандыла. Быллай жумушла аш-азыкъ культураны айнытыргъа, адамланы бир бирлерине жууукълашдырыргъа себеплик этгенлерине уа сёз жокъду.