Биринчи жерде ‒ социал магъаналы соруула

Къабарты-Малкъарны Регионнга оноу этиу жаны бла арасы (ЦУР)  республиканы инсанлары бла власть органланы арасында байламлыкъны жалчытырча эм чыкъгъан соруула къысха заманда  тамамланырча ишни  тири бардырады.  Аланы кёбюсю социал сетьледе «Telegram», «Одноклассники», «ВКонтакте» кётюрюлген «Инцидент Менеджмент» системаны амалы бла жарашдырылгъан сорууладыла. 

Анга кёре озгъан айда арагъа социал  сетьлени себеплиги бла 2600-ден аслам соруу берилгенди.  Аланы кёбюсю, хар замандача, социал къоруулау, жашау журт-коммунал мюлк, тийрени игилендириу, жолланы тапландырыу, зыбыр къалгъан-къулгъанланы ташыу, энергетика эм башхала бла байламлыдыла. Специалистле, аланы хар бирине  тынгылы къарап, профильлерине кёре  тийишли ведомстволагъа билдиргендиле.

Тарыгъыуланы кёбюсю Нальчик бла Прохладный шахар округлада эм Чегем муниципал районлада жашагъанладан келгенди.  Алгъа заманда жууап берилирча иги кесек сакъларгъа тюшгени  кёплеге тап болмагъанды. Энди уа, орта эсеп бла алып айтханда, бир сагъат бла жарымдан  кёпге созулмагъаны ишни бютюн жетишимли бардырыргъа онг тапдырады.  

Сагъынылгъан кезиуде ЦУР республиканы  районларында тийишли инстанциялы себеплиги бла эркинликсиз  кир-кипчик тёгюлген жерлени  къурутургъа,  жылыу,  таза суу бла жалчытыргъа, жолланы жангыртырча, кече   жарытырча эм башха жумушланы тамамларгъа болушхандыла.
ЦУР озгъан айда социал сетьледе кётюрюлген жарсыулагъа аслам халда эс бургъан муниципалитет къурамланы бла регион ведомстволаны эсеплерча тёрели рейтинг да ётдюргенди.

Эсеплени чыгъарырдан алгъа сорууланы къаллай бир заманны ичинде тамамланнганларына, тынгылы толтурулгъанларына эм башха шартлагъа да эс бурулгъанды. Алай бла бу жол биринчи бла экинчи  жерлеге КъМР-ни Саулукъ сакълау  бла Транспорт эмда жол мюлк министерствола тийишли болгъандыла. Ючюнючю жерге уа Тарифле эмда жашау журтлагъа надзор  этиу жаны бла къырал комитет бла Урунуу эмда социал къоруулау министерство чыкъгъандыла. Муниципалитетлени юсюнден айтханда, биринчи жерни Нальчик шахар округну администрациясы алгъанды. Прохладна бла Басхан  районла экинчи бла ючюнчю жерледедиле.  

Рейтинг  биринчи кере 2021 жылда бардырылып тебирегенди.  Аны магъанасы толтуруучу власть органла бла жер-жерли самоуправленияланы ишлерине багъа бичергеди эм власть бла жамауатны арасында байламлыкъны айнытыргъады.

Андан сора да, ыйыкъ  сайын бардырылгъан рубриканы чеклеринде КъМР-ни Башчысы Казбек Коков бла интервью бардырылгъанды. Аны кезиуюнде  саулукъ сакълау жолланы жангыртыу, улоуланы санын кёбейтиу, билим бериуню айнытыу, жамауат жерлени бла арбазланы тапландырыу, тёгерек-башны жашиллендириу эм башха соруула да сюзюлгендиле.

Эсге сала айтсакъ, Регионнга оноу этиу ара офис халда ишлемейди, «Инцидент менеджмент» бир тюрлю соруугъа  эс бурурча социал сетьлени биринде сагъынылыргъа  эм  тынгылыракъ ачыкъланыргъа  керекди.