Туристлени санына иги кесек къошулгъанды

Арт жыллада Шимал Кавказда, ол санда Къабарты-Малкъарда, солургъа сюйгенлени санына танг къошула барады. Сёз ючюн,  быйыл августда  Элбрус тау-лыжа курортда 85 мингден аслам адам солугъанды, деп билдириледи  Шимал-Кавказны айнытыу жаны бла Кавказ.РФ биригиуню пресс-службасындан.

Саулай алып айтханда, биригиуге бойсуннган курортлада жайда  300 минг турист солугъанды.  Аланы иги кесеги, неда 84 422 адам,  Элбрусха жетеди. Аны бла бирге 15 августда Дима Биланны концерти болгъанда,  9 712 адам келгени да ахшы себеплик этгенди.  

Быйыл бирге къауум болуп келген туристлени саны да 55 минг адамгъа жетгенди, ол да 8 процентге кёпдю. Бютюнда аланы санында  школчула  кёп болгъанлары  къууандырады. Мында да 38 процентге ёсюм эсленеди. Жайда саулукъларын кючлеген эм жараула этген спортчула да бирси заманладан  15 процентге кёбюрек болгъанларын да белгилерчады. 

Биригиуде Элбрусда канат жолланы къыш кезиуге хазырларча болжаллы халда  жабаргъа тюшгенлерин да жамауатны эсине саладыла.