Сугъарылгъан жерлеге къошулады

Быйылны башындан бери Къабарты-Малкъарда «Эл мюлкге бёлюннген жерлени хайырланыу эм сугъарыу» федерал проектге кёре жерлени 6,7 минг гектар чакълы бири  сугъарылгъандыла, деп билдириледи КъМР-ни Эл мюлк министерствосундан.

Сабанчыла къыралны жанындан  болушлукъ тапханларыны хайырындан, жыл сайын жауун жауудуруу эмда тамычы амалла бла сугъаргъан оборудование къоллу боладыла. Ол а агропромышленный комплексни айнытыугъа болмагъанча магъаналыды. Ол амалланы кенг хайырланыу бай тирлик алыргъа эмда иги кесек  файда тюшюрюрге къолдан келеди. Сёз ючюн, сугъарылгъан жерледен тирликни эки кере алыргъа жарайды. Кюзлюкледе тирликни кетергенлеринден сора, ызы бла мирзеулюк бла силослукъ нартюх, къара будай, соя эм башха битимле салынадыла.

Аллай жерлени асламысы Прохладна райондадыла. Андан сора да, Лескен, Май, Терк, Чегем эм Урван районла да ала иги кесек боладыла. Алада кёбюсюнде къылкъылыла ёсдюрюледиле. Аны бла бирге жемиш бла наныкъ ёсген мюлкледе да сугъарыу тири хайырланылып тебирегенди. Аны къыйматлы болгъанын ангылап, мюлклени иелери да тийишли оборудование къоллу болургъа излейдиле.

Эсге сала айтсакъ, былтыр республикада сугъарылгъан жерле 40 минг гектардан аслам болгъандыла. Аланы иги кесегинде, ол санда 23,6 минг гектарда  жемишлеге бла наныкълагъа эм 3,5 минг гектарда тахта кёгетлеге, суу тамычы амал бла салынады.