Иги кесек продукция чыгъарылгъанды

Шимал Кавказны статистика управлениясындан билдиргенлерича, быйыл жылны башындан бери Къабарты-Малкъарда эл мюлк организацияла, элли фермер мюлкле эм энчи иелиле 30 миллиард сом багъасына продукция сатхандыла. Былтыр бу заман бла тенглешдиргенде, ол 2,3 процентге кёпдю. 

Аны бла бирге сагъынылгъан кезиуде малчылыкъ бла байламлы продукциягъа къошулгъанын да энчи белгилерчады. Ол санда малланы бла юй къанатлыланы этинден (союлмагъан ауурлукъда) – 71,5 минг тонна, сютден 314 минг тонна сауулгъанды эм жумуртхаладан да 123,3 миллион чакълысы алыннганды. Саулай алып айтханда, юч къауумда да 0,2, 3,2 эм 2,9 процент ёсюм эсленеди.

Жерчилик бла байламлы мюлкледе да быйыл бай тирлик алыр муратлары барды. Кёп болмай  къылкъылыланы оруп бошагъандыла, бусагъатда уа тахта кёгетлени, картофну эм жемишле бла наныкъланы жыйып кюрешедиле. Бу айда нартюхню да оруп башларыкъдыла.