Биринчи классха бютюн кёп сабий келгенди

Хасанияны 16-чы номерли  мектебинде   окъургъа  быйыл биринчи классха элли жашчыкъ бла къызчыкъ келгендиле, 11-чиге уа - 34 адам. Бюгюн ала мектепни майданында ёхтем сюеледиле. Хар бирини да бетлери жарыкъды.

Къууанчлы линейка РФ-ни эмда КъМР-ни байракъларын кётюрюу эмда  гимнлерин эшитдириу бла башланады.    Окъуучуланы, устазланы, ата-аналаны да директорну къуллугъун толтургъан Жарашууланы Эльмира  алгъышлагъанды. Ата-аналаны жашларын бла къызларын  бу мектепге бергенлерине  сокъуранмазларына ышандыргъанды, мында устазланы  кючлю  къаууму ишлегенин  чертгенди.

Сора сабийлеге айланып, жангы окъуу жылда муратлары толурларын тежегенди. Билимни дуниясына  кёллери бла батарларына ийнаннганын да билдиргенди. Алагъа былай насийхат да этгенди: «Ата-аналарыгъызны сюйюгюз, абаданлагъа хурмет эте билигиз, устазларыгъызны айтханларын  толтуругъуз».

Сыйлы къонакъланы араларында  КъМР-ни билим бериуде ишлегенлени профсоюзларыны  жамауат биригиуюню Нальчикде бёлюмюню таматасы Татьяна Вологирова да болгъанды. Ол сабийлеге бек иги окъургъа борчлу болгъанларын эсгертгенди, ата-аналагъа балаларындан  ёхтемленирча болурларын тежегенди, устазлагъа уа сый бергенди.
 Тамата классланы окъуучулары уа мектепге энди келгенлени жырлары, назмулары эмда  саугъачыкълары бла къууандыргъандыла.       

Ахырында уа биринчи къонгуроуну урургъа  1-чи классха келген Жылкъыбайланы Абдурахманнга бла Ностуланы Мединагъа, 11-чи классланы окъуучулары Хапаланы Джамилягъа,  Жылкъыбайланы Тимургъа сый берилгенди.  

 Жангы окъуу жыл башланды. Тёрели  къууанчлы линейка да ариу озду. Ол устазланы, сабийлени да  огъурлу, насыплы жолгъа  элтсин!