Къоркъуусузлукъну жалчытыуну амалларын сюзгендиле

Къабарты-Малкъарда солугъанланы къоркъуусузлукъларын жалчытыугъа, регионда туризмни айнытыугъа аталып жыйылыу болгъанды, анда билдириулени Следствие комитетни, МЧС-ни, МВД-ны республикада бёлюмлерини, Курортла эм туризм министерствону келечилери этгендиле.

Ала, Россейдеги сегиз бешминглик таудан жетиси бизни республикада орналгъанларын, Минги тауда солургъа аслам адам сюйгенин эсгерте, бийик таулада, чыранлада, къыйын жерледе къоркъуусузлукъну сакълау тынч жумуш болмагъанын белгилегендиле. МЧС-ни келечиси Гюлюйланы Мухаммат республиканы тауларына къоркъуусуз ёрлерча альпинистлеге къаллай экипировка керек болгъаныны, Минги таугъа бла Бызынгы ауузгъа жолоучулукълада къаллай къоркъуула сакълагъанларыны юсюнден билдиргенди.

Следствие комитетни келечиси Мурат Багов, бийикликледе туристле бла альпинистле къаллай сылтаула бла ёлгенлерини юсюнден айта, таулада право низамгъа бузукълукъланы санын тыярча, къыйын болумланы азайтырча къаллай  мадарла этерге боллугъун эсгертгенди. Республикада ич ишле министерствону келечиси Аслан Максидов а туристле солугъан жерледе право низамны сакълауну, инструкторла аттестацияны ётгенлерин бла къалгъанларын эсепде тутунуу юсюнден сорууну кётюргенди.

Курортла эм туризм министерствону бёлюмюню башчысы Виолетта Каскулова да солугъанланы къоркъуусузлукъларын сакълау баш магъаналы борчладан бири болгъанын белгилегенди. Ол туристлени кеслерин да къоркъуусузлукъну жорукъларына уллу кёллюлюк этмезге, жангызда аттестацияны ётген инструкторланы болушлукъларын излерге, учуз багъаны сылтауу бла качествода тас этмезге чакъыргъанды.              

Ахырында жыйылыугъа къатышханла тири солууну сюйгенлени къоркъуусузлукъларын жалчытыуну амалларын бютюн игилендирирге кереклисин чертгендиле.