Къарын ауруула заманында тинтилирча

Бюгюнлюкде  "Узакъ ёмюр эм тири жашау бардырыу" миллет проектге кёре  Къабарты-Малкъарда поликлиникала жангы  эндоскопия стойкала бла жалчытылыннгандыла, деп билдиргендиле КъМР-ни Саулукъ сакълау министерствосундан.

Алай бла жангы оборудованияны хайыры бла аш орунлары бла чегилери къыйнагъанлагъа   скрининг этерге неда  тынгылы  анализ  бардырыргъа, аны бла  аурууну башлана тургъан  кезиулеринде жокъларгъа онг барды. Сёз ючюн, аны  эндоскопларыны алларында орналгъан  видеокамераларыны себеплиги бла   къыйын  жерледе бузукълукъланы кёрюрге   жарайды. Быллай амал  уллугъа, гитчеге да   къоркъуусуз болгъанын да энчи белгилерчады.

Быйыл жылны башындан бери диспансеризацияны чеклеринде  сагъынылгъан  оборудованияны себеплиги бла 91 адамны    чегилеринде рак тинтилгенди, ол санда 73-де ол башлана тургъан кезиуюнде ачыкъланнганды. Ол алгъадан билинсе, анга жетишимли багъаргъа жарагъанын да энчи белгилерчады.
Эсге сала айтсакъ,   диспансеризацияны чеклеринде эндоскопияны ётерге амал барды, аны ючюн  жаланда   участканы терапевтинден направление алыргъа керекди.