«Айырыуланы къоркъуусузлукъларын бла ачыкълыкъларын жалчытыр ючюн битеу кючню бирикдирирге керекди»

Россейни Ара айырыу комиссиясына кирген Игорь Борисов  Россей Федерацияны Жамауат  палатасыны  миллетле эмда динле аралы халла, миграция жаны бла да комиссияны жыйылыууна къатышханды. Анда  айырыуланы къоркъуусузлукъларын бла ачыкълыкъларын жалчытыуда миллетле эмда динле аралы халланы магъаналарыны юсюнден сёз баргъанды.

 Игорь Борисов  белгилегенича, къыралда бла жамауатда миллетлени бла динлени араларында халлагъа душманларыбыз не заманда да уллу  эс бургъандыла, алагъа къыралны ырахатлыгъын бла къоркъуусузлугъун бузууну амалларынача къарагъандыла.  Къырал Думаны тогъузунчу чакъырылыууна депутатланы айырыу жаны бла уллу кампания бара тургъан кезиуде миллетле эмда динле аралы халланы себепликлери бла халны бузаргъа эмда айырыулагъа чырмау этерге кюрешиу бютюн кючленеди. Душманларыбыз, миллет эмда дин сылтауланы кеслерини «чабыууллукъларына» къошуп, жамауатны тюрлю-тюрлю къауумларын бир бирге юсгюрюп, ол кюрешде алай бла  хорларгъа умут этедиле.

   «Россейни 30 жылдан артыкъ заманны алжаусуз айный баргъан айырыу системасыны мураты халкъны ыразылыгъы бла къуралгъан власть институтланы жангыдан сайлау демократия халда баргъан кезиуде миллетлени неда динлени араларында бир бирге къажаулукъну къозгъаргъа кюрешгенлени жолларын кесиудю», - деп чертгенди Игорь Борисов.  Анга уа, ол оюм этгенден, айырыуланы къурагъанланы битеу конфессияланы бла миллетлени, Россейни  саулай халкъларыны да келечилерине закон излегенча тенг кёзден къарагъанлары эмда айырыу кампанияны кезиуюнде социал, расалы, миллетле аралы къаугъала къозгъаргъа эркин этилмегени  себеплик этерге керекдиле.     

Россейни Ара айырыу комиссиясыны келечиси дагъыда Россей Федерацияда айырыулагъа миллетле эмда динле бла байламлы сылтаула бла бир тюрлю тыйгъыч салынмаз ючюн, тийишли законнга тийишли мадарла этилгенлерин билдиргенди.  Ол мадарлагъа айырыу биригиулени миллетлеге неда динлеге кёре къураргъа эркин этмеу, айырыу округланы аз санлы тамыр халкъла бирге жашагъанларын эсге алыу бла къурау, бюллетеньлени Россей Федерацияны халкъларыны тиллеринде басмалау эмда тохташдырылгъан мардалагъа бузукълукъ этгенлени къаты юридический жууапха тартыу киредиле.

«Жаланда Россейни къырал органлары, жамауат-политика кючлери, тёрели дин организациялары, миллет-маданият биригиулери бла айырыучулары айырыулагъа чырмау этерге  эмда жамауатны  айырыулагъа ышаныулугъун эниш этерге кюрешгенлеге бирча  къажау сюелселе, келишиулюкде мадар этселе, ол заманда Россейни  айырыучуларыны сайлау этерге эркинликлерин къорууларгъа къолларындан келликди»,- деп чертгенди Игорь Борисов.