Туризмни айнытыуда ахшы къошумчулукъ этерчадыла

Кёп болмай ишчи жолоучулукъларыны чеклеринде КъМР-ни Правительствосуну Председатели Мусукланы Алий  бла республиканы курортла эм туризм министри Аскер Бифов  «Гедуко» бла «Янтарный» саулукъ кючлеу комплекследе болгъандыла.

Аны кезиуюнде ала  объектлени мюлк-техника, рекреация онглары бла шагъырейленнгендиле эм айнытырча онгланы да сюзгендиле.

 Эм биринчи ишчи къауум  Басхан районда «Гедуко» деген комплексни инфраструктурасына къарагъанды. Бюгюнлюкде ол толу кючю бла ишлеген, уллу, гитче да  аслам келген жерди. Аны жылы суулары бла бассейнлери,  массаж этген гоппанлары, сабийлеге суу шахарчыгъы,  эт къуууручу, энчи бассейнлери бла солугъан арбазчыкълары, туз бла бакъгъан отоулары, арзы агъачдан этилген чыккырлары бла  кабинетлери, бюгюннгю излемлеге келишген къонакъ юйлери, миллет азыкъла хазырлагъан кафелери эм жаш адамланы арасында уллу сурам болгъан   картинг арасы да барды. 

Андан сора да, ол кюн  къонакъла «Янтарный» комплексде да болгъандыла. Мында алыкъа этилирге керек иги кесек зат болсада,  келир заманда аны инфраструктурасын игилендирип,  регионну белгиси этерге умутлары болгъанын да билдиргендиле.   Аны бла байламлы мында къонакъ юйле ишленирикдиле, автокемпинг да къураллыкъды.  Алай бла Прохладна районда  жангы излемлеге келишген туризм кластер къурарча мадар этилликди. 

Ахырында  эсепле чыгъара, Мусукланы Алий объектлени социал эм  экономика жаны бла къыйматлылыкъларын айта, аланы айнытыргъа кереклисин эм  туризмни аякъландырыуда да ахшы себеплик этериклерин  белгилегенди.