Ток ызлагъа иги кесек жангы объект къошулгъанды

Быйыл жылны башында бери  «Россети Северный Кавказ» – «Каббалкэнерго» биригиу  электрокюч баргъан ызлагъа 975 чакълы жангы хайырланыучуланы къошханды. Саулай алып айтханда, ала 38,8 мегаватт (МВт) ток бла жалчытылыннгандыла.

Хар заманладача, бу кезиуде да баш магъана социал объектлеге берилгенди.

Сёз ючюн, "Узакъ ёмюр эм тири жашау бардырыу" миллет проектге кёре, энергетикле Шимал-Кавказ федерал округда эм уллу онкология диспансерге 2,6 МВт ток берилирча этгендиле. Ол бир тюрлю сылтау бла электрокючсюз къалмазча, анга  бир бирден башха эки ыз тартылгъанды. Аны бла байламлы бири ёчюлсе, кеси аллына башхасы ишлеп тебирерча акъыллы система да жарашдырылгъанды.  

Дагъыда Нальчикде сууну тазалагъан станция,  Хасанияда спорт зал эм  Заюковода  чыгъармачылыкъ школ да ток ызлагъа къошулгъандыла.

 Битеу да, сагъынылгъан жети айны ичинде «Каббалкэнерго» биригиуге ток ызлагъа къошулурча 1703 билдириу  этилгенди. Аланы тынгылы жалчытырча 87,1 МВт ток керек боллукъду. Бюгюнлюкде бу жаны бла  жумуш толтурулурча   мадар этиледи. 

Эсге сала айтсакъ, жангы хайырланыучуланы ток ызлагъа къошарча эм электрокюч бла тынгылы жалчытырча жумуш  энергетиклени баш борчларындан бирине саналады. Аны себепли бюгюнлюкде «Россети»  биригиуде сетьлеге къошулургъа сюйгенлеге таплыкъгъа электрон халда  заявка берирча сервис ишлейди. Ол санда Портал-ТП.РФ сайтда энчи кабинетге кирип, ток ызгъа къошарча заявка берирге эм къаллай бир  электрокюч керек болгъанын да белгилерге жарайды.