Ырахматлыкъны тириликде излегиз

Россейни Саулукъ сакълау министерствосу бу ыйыкъны спортну саулукъгъа хайырлылыгъын ангылатыугъа жоралагъанды. Аракъы, наркотикле ичгенле уудан зауукълукъ алыргъа излейдиле, кёплери уа жюрек къыйынны, къайгъыларын, жарсыуларын унутургъа кюрешедиле. Алай адамны къууандыргъаны, ырахматлыкъ сездирген дофаминни бла серотонинни уулада угъай, тириликде, спортда излерге керекди, деп ангылатадыла бизге КъМР-ни Саулукъ сакълау министерствосуну Психиатрияны бла наркологияны клиника арасыны келечилери. 

- Адам спорт бла кюрешген кезиуде кёлю кётюрюледи, нерва системаны иши тапландырылады. Чапханда неда жюзгенде кортизол азаяды. Белгилисича уа, адамны мугурайыуу, стресс бу гормонну ёлчеми бла байламлыды, - дегендиле клиникадан.

Спорт бла алгъын бир заманда да кюрешмеген неден башларгъа керекди, деп сорургъа боллукъсуз. Алай олимпиаданы чемпиону бла тенг болама, деп, къадалыргъа керекмейди. Бизни борчубуз зауукълукъ алыргъады, барын да озар муратыбыз жокъду.

- Спортну саулукъгъа хайырлы юч тюрлюсюн белгилерге боллукъду. Биринчиси, жаяу жюрюу. Бу кезиуде санланы асламы ишлейдиле, ол санда жюрек къарыу алады, мыйы кислород бла байыкъланады. Аны хайырындан сагъышларыбыз, акъылыбыз тазаланадыла, - дейдиле клиниканы келечилери.

Дагъыда саулукъгъа жюзюу хайырлыды. Суу адамны битеу санларын женгиллетеди, нерва системаны тынчайтады. Йоганы саулукъгъа хайырыны юсюнден кёп айтылады. Аны бла алгъын жараула ахыр да этмегенле да кюреширге боллукъдула. Йога санларынгы «эшитирге», «ангыларгъа» болушады, солууунгу тапландырады.

- Биринчи кюнледе жарауну 15-20 минут бардырыргъа боллукъду, ызы бла заманны аз-аздан кёбейтирге жарайды. Спортда эм магъаналысы – къоймай, дайым да кюрешиудю. Эринмегиз, бюгюн окъуна башлагъыз. Къысха замандан санларыгъыз, аны бла бирге сагъышларыгъыз, ич дуниягъыз игиленнгенлерин сезериксиз. Алай шёндю кесигизге бакъдыра эсегиз, къаллай жараула жарагъаларыны юсюнден врач бла кенгеширге керекди, - дегендиле клиниканы врачлары.