Ол бизни жюреклерибизде жашайды

Кесини аппасы Чочуйланы Хахайны жашы Магометни юсюнден аны туудугъу Гергъокъланы-Магрелланы Фатима жазгъанды.

Аппам уруш жолун  Георгиевскден башлап, Уллу Хорламгъа  Германияны тийресинде  тюбегенлени  санында болгъанды.

Ол 1923 жылда Черек ауузунда  Къоспарты элде  туугъанды. Сабийликден  анасындан ёксюз къалып, уллу юйюрге болушлукъ этер  муратда  школну къоюп, колхозгъа ишлерге  чыгъады. Анда ишлей тургъан кезиуде  къанлы 1941 жыл  башланады. Ол жылны июль айында фронтха кетеди. Бир ай Георгиевск шахарда  окъуп, андан ары уа урушну  къызыууна тюшеди. Мараучуланы полкуна артиллерия расчетну  наводчиги болуп киреди.  Къысха заманны ичинде атлы дивизия къуралады, таулу жигит да анга кёчюрюледи.

Чочуй улу Сталинград сермешде, Украинаны азатлар ючюн къазауатда жигитлигин кёргюзтгенди. 1943 жылны май айындан башлап 163-чю атлы полкну  санында Кюн батхан Украина ючю сермешлеге къатышханды.

1944 жылны март айыны ал кюнлеринде генерал  И.А. Плиевни башчылыгъында атлы-механизацияланнган къауум  къураргъа оноу этеди.  Бу къауумгъа терк тамамларгъа деп борч берилгенди: фронтну баш ызында  жетишимли сермешлени  андан ары бардырыргъа. Плиев кесини къауумуна жаланда батыр  аскерчилени  жыйгъанды. Магомет бу  къауумгъа биринчилени санында киргенини юсюнден не заманда да ёхтемленип айта эди.

Таурухлукъ Плиевни къауумунда  Чочуй улу дагъыда Польшаны, Чехословакияны, Румынияны, Венгрияны, Германияны фашизмден къутхарыу сермешлеринде болгъанды. 

Чехословакияда таулу  жигитни сол аягъы жаралы болады. Госпитальда бир ай  багъылгъанындан сора, ол кесини полку бла фашистлени Берлинге дери  къууаргъа къайтады. Мында, Германияны  жерлеринде, аланы полку Уллу Хорламгъа тюбейди. Алай дагъыда бу къыралны жерлерини кёбюсюн власовчуладан тазаларгъа керек эди. Ол борчну аланы полку толтургъанды.

Андан сора уа. Плиевни къауумун Япония бла урушха бурадыла. Алай бу къазауатда Магометге кёп мычыргъа тюшмеди. Аны полку ол заманда Белоруссияны тийресинде болгъанды. Ала Япониягъа жетгинчи, уруш да бошалады.

Чочуйланы Магомет аскерден 1947 жылны декабрь айында эркин этилгенди. Урушну кезиуюнде болдургъан жигитлиги ючюн Ата журт урушну 2-чи даражалы ордени бла саугъаланнганды, «За отвагу», «За боевые заслуги», «За Победу над Германией» майдаллагъа тийишли болгъанды.

Урушдан сора Магомет жууукъларын Киргизияны Ош областыны Наукат элинде табады. Эки жылны Чапаев атлы колхозда ферманы башчысы болуп тургъанды. Жеккеланы Ибрагимни къызы Маруся бла юйюр къурагъанды. Ала Къызыл-Къая  шахаргъа кёчгенден сора, Магомет шахтада ишлеп башлагъанды. Анда онеки жыл уруннганды.

Туугъан жерине къайтхандан сора, 1966 жылда Бабугент элде тохташханды. 1966 жылдан 1974 жылгъа дери Къашхатауда агъач мюлкде ишлеп тургъанды. Фронт жаралары кеслерин билдире, кёзлери иги кёрмей къыйналгъанды. 2001 жылда дуниядан кетгенди. Энди бизни жюреклерибизде жашайды.