Бирсилени къайгъыларын кёрюп

Быйыл  20 августа тюшде  Россейни МВД-сыны «Нальчик» бёлюмюнде къуллукъ этгенле – полицияны лейтенанты Аскер Барсагов, сержант Инал Гугов эм гитче сержант Гуппойланы Алина  Марко Вовчок атлы орамда къаты желден бла сакъ жауундан сора  аууп,  жолну  жабып тургъан терекни кёргендиле. Полициячыла алайда  авария болмаз  эм  адамгъа бир тюрлю  хата жетмез ючюн олсагъат   болумну тюзетир мадарла излегендиле. Ол санда  алайтын машина ётмез ючюн, тёгерегин бегитип, чек салгъандыла.  Ызы бла, башхала да болушуп, терекни жолну юсюнден бир жанына  кетергендиле. 
Алай бла полициячыланы тирнекликлерини хайырындан къысха заманда тыйгъычны  кетерирге, транспорт чырмаусуз жюрюрча эм адам да ачымазча этерге онг болгъанды, деп билдиргендиле КъМР-де МВД-ны пресс-службасындан.