Россейни рекордларыны китабына жазылгъанды

Кёп болмай Нальчикде Абхазия майданда «Бизни Кавказ» деген  биринчи туризм фестиваль болгъанды. Алай бла юч кюнню ичинде  Россейни регионларындан келген къонакъла, Къабарты-Малкъарны келечилери бла бирге тау жоллалны къыдырып, тёгерек-башха къараргъа, жомакълы табийгъатыбыз бла шагъырейленирге онг тапхандыла.

Жолоучулукъну кезиуюнлде  Россейни къырал байрагъыны кюнюне атап  тёрт чархлары да тартхан автомобильле бла Чегет-Жары ауушха чыкъгъандыла. Жолну узунлугъу Огъары Малкъардан Бызынгыгъа дери 30 километрге  созулады. Аны тёппеси уа 3147 метр бийикликде орналады эм къоркъуулу жерге саналады. Ол кюн мында  «Россейни эм бийик тау автомобиль ауушу» деген рекорд да  тохташдырылгъанды. Аны бла бирге мында къыралны 20Х30- метрлик байрагъын да  жайгъандыла.

Россейни рекордларыны китабын къурагъан эм баш редактору Станислав Коненко ол кюн кеси  тёгерек-башха къарап, ёнчелеп,  шартланы тинтгенден сора,  рекордха тийишли болгъанын  тохташдыргъанды эм шагъатлыкъ къагъыт да бергенди. Ол айтханнга кёре, бусагъатха дери жолну энчилигине киши эс бурмагъанды, бюгюн а ол кемчилик  кетерилгенди. 

Андан сора да, фестивальны чеклеринде Черек районда къонакъланы  чыгъармачылыкъ программа сакълагъанды эм миллет азыкъла бла   сыйлагъандыла, ГАЗ-69  машиналаны кёрмючю да ётгенди.

Ахырында жолоучулукъгъа къатышхан жюз экипаждан асламысына   шагъатлыкъ къагъытла да берилгендиле.