Уллу кёллюлюк - артыкъ къоранчланы сылтауу

Быйыл ючюнчю кварталда  «Газпром межрегионгаз Нальчик» биригиуню  специалистлери  4 мингнге жууукъ  кёк отлукъну эсеплеген приборгъа къараргъа керек боллукъдула. Аны бла бирге хайырланыучула счётчиклерини болжаллары  озмазча кеслери къайгъыргъа кереклерин да эслерине саладыла. Нек дегенде уллу кёллюлюк артыкъ къоранчлагъа келтирирге боллукъду,  деп билдиредиле кёк отлукъ бла жалчытхан биригиуню пресс-службасында.

Законодательствогъа кёре, счётчикни  болжалы озгъан эсе, кёк отлукъ ючюн   нормативлеге кёре тёлерге тюшерикди. Ол прибор кёргюзтгенден   иги да кёбюрек болады. Аны себепли хар адам да кеслери  анга заманында эс бурургъа эм  показанияланы билдирирге тийишлидиле. Бу жаны бла бузукълукъ этилсе,  нормативлеге кёре тёленнген ахчагъа  перерасчёт  этилмейди. 

Эсеплеген приборлагъа къаратырча неда жангысын салдырырча жашагъан жерлеринде кёк отлукъ бла жалчытхан биригиуге заявка берирге керекди. Ызы бла счётчикге къаралырча  Къабарты-Малкъарны  Стандартизация,  метрология эм сынау арасына (ЦСМ)  бериледи.

Счётчикни ишлерге жарагъан кезиуюню юсюнден   техника   паспортунда, квитанциясында неда абонентни "Энчи кабинетинде" жазылады.   Аны моделине кёре,  4 неда 12 жыл бериледи.

Эсге сала айтсакъ, приборну ишлерге жарагъан кезиую аны чыгъарылгъан  заманындан тергеледи.  Ол себепден эскисин алып,  къысха заманда алышыргъа тюшмезча, къагъытланы тынгылы   къарап алыргъа керекди.