Къыралны кючлюлюгю - инсанларында

«Машук» форумгъа къатышханла бла «Ичгичиликге бла наркоманиягъа къажаулулукъ бла» битеуроссей жандауурлукъ фондну Ставропольда бёлюмюню башчысы Кишиликни орденини кавалери «Доброград» жыйылыуну къурагъан Валерий Митрованенко тюбешгенди.

Къонакъ жаш адамлагъа энчи аскер операция болгъан жерге гуманитар болушлукъну тапдырыуну, аскерчилеге, мамыр адамлагъа да болушлукъ этиуню, къазауатны хатасы жетген сабийлени реабилитацияларын бардырыуну ююснден айтханды. Ол белгилегенича, болушлукъ, кертиси бла да, аны излеген адамлагъа этилирге тийишлиди. Жандауурлукъ бла кюреширге сюйген инсан анга къаллай борчла салыннганларын, не тюрлю къоркъуулагъа тюберге боллугъун ангыларгъа эмда анга кёре хазырлылыкъда турургъа керекди. Гуманитар болушлукъну хайырлылыгъы, ол угъай, болушлукъ этилген адамланы жашаулары да бу шартла бла къысха байламлыдыла.          

Сёз Шимал Кавказны халкъларыны бирликлерини юсюнден да баргъанды. Спикер, гуманитар ишлеге башха-башха регионланы келечилери къатышханларын чертип, бир бирге къайгъырыу, нёгерле ючюн жууаплылыкъ СВО-да бютюн бек сезилгенлерин айтханды.

 Жаш адамла къонакъларыны бла аны гуманитар болушлукъну элтирге болушхан тенглерини бу жумушда сынамларыны юсюнден билирге сюйгендиле. Бу ишлерини юсюнден айта, Валерий Митрованенко пилотсуз учхан аппаратланы, ала жолда болгъан кезиуде этилген чабыуулланы юслеринден хапарлагъанды. Энчи уа сабийлени къадарларыны юсюнден сорууда тохтагъанды. «Ата-анадан ёксюз къалыу, къоркъуусуз жерлеге тохтаусуз кёчюп айланыу, адыргылыкъ, къазауатдан чыкъгъан башха къоркъуула,  уруш бошалса да, гитче сабийни эсинде къала, кёп жыллагъа тынчлыгъын аладыла. Аны ючюн сабийлеге реабилитация программаланы жарашдырыргъа, не жаны бла да болушургъа керекди. Урушла, къазауатла аланы огъурсуз, неда мугурайып турурча этерге боллукъдула. Аны ючюн а сизге да бу ишге эс бурургъа керекди», - дегенди ол.

Ахырында эксперт жыйылгъанланы добровольчествогъа кеслерини фахмуларын айнытыргъа, жууаплылыкъларын ёсдюрюрге онг берген амалгъача къараргъа чакъыргъанды. Ол белгилегенича, хар инсаны къарыулу болса, жанындагъылагъа къайгъыра билсе, къыралыбыз да кючлю боллукъду.