Ветеранларыбызны, аскерчилерибизни да сыйларын кёрюп

Россейни къырал байрагъыны кюню бла байламлы байрамны аллында  Россейни халкъларыны ассамблеясыны регион бёлюмюнде Халкъла аралы черкес ассоциация, Агропромышленный  комплекс чыгъаргъан продукцияны качествосуна багъа берген ара эмда  республиканы Маданият фонду сейирлик тюбешиу къурагъандыла. Ары жамауат организацияланы келечилери, энчи аскер операциягъа къатышхан ветеранла эмда жарыкъ жашау, Ата журт  ючюн жанларын бергенлени жууукъ адамлары келгендиле. Анда бардырылгъан тюбешиуню баш магъаналы темасы жамауатны биригиую эди.

РФ-ни Президентинде  Миллетле аралы  болумла жаны бла  советни келечиси, МЧА-ны таматасы Хаути Сохроков быллай тюбешиуле  миллетлени, динлени араларында шуёх байламлыкъны бютюн къаты кючлендирирге себеплик этгенлерин чертгенди. «Быллай тюрлю  себеплик этиу инсанланы  къыралны баш магъаналы ишинде бирликни, тенгликни кёргюзтеди. Ол бизни келир заманнга, хорламгъа салгъан къыйыныбызды»,-деп къошханды Хаути Хазритович.

Къонакъланы араларында  энчи аскер операциягъа къатышып къайтхан ветеранла Ахмед Канкуев,  «Ата журтну къоруулаучулары» фондну  келечиси Чеченланы Эльдар эмда  аскер операцияда жигитча сермеше, жанларын берген Залим Шериужевну бла Тембулат Унагасовну жууукълары да бар эдиле.

Хаути Сохроков ветеранлагъа бюсюреу письмола,  жоюлгъан жигитлени жууукъларына уа саугъала бергенди.

Андан сора залда олтургъанлагъа юч тюрсюнлю байракъны  тарыхыны юсюнден фильм кёргюзтгендиле.