Саулукълу жашау бардырыргъа онгла къурай

Бызынгыда  бу кюнледе  «Спорт- жашауну мардасы» деген федерал проектге тийишлиликде  «Жашауну узакъгъа созуу» программаны чеклеринде  спорт залны къурулушу башланнганды, деп билдиргендиле  Черек районну администрациясыны пресс-службасындан.

Мекям элни арасында  мектепни эмда  Маданият юйню къатларында  ишленеди. Ол а эллилеге физкультура эм спорт бла  кюреширге  тап амалды.

Мекямда профессионал ринг боллукъду, бокс эмда тутушуу бла  кюрешириклеге энчи жерле бёлюнюрюкдюле.

Жангы залда бир жолгъа къыркъ адам жарау этерге амал табарыкъды. Аны ишлеу  бызынгылылагъа бютюнда магъаналыды. Нек дегенде анда арт бир ненча жылны ичинде  спортну бокс тюрлюсю тынгылы айнып келеди эмда  кючлю спорт школ къуралгъанды, тюрлю-тюрлю эришиуледе белгили жетишимле болдургъанла да  бардыла.

Шёндюгю заманны сурамларына тийишли спорт зал сабийлени эмда жаш тёлюню спорт бла кюреширге кёллендирликди  эмда Черек районда спортну айнытыугъа  кюч берген кезиулю атлам боллукъду, деп айтылады билдириуде.