Жюреклеге жол тапхан тизгинле

Бу кюнледе Тырныауузну 3-чю номерли шахар библиотекасында тюбешиу болгъанды. Бу жол китапханачыла ары Сарбашланы Азнорну чакъыргъандыла.

Тюбешиуню Къабарты-Малкъарда  Урунуу  эм социал къоруулауну министерствосуну Элбрус районда филиалы кесини «Тирнекли къартлыкъ» деген программасына кёре къурагъанды. Ол филиалны мурдорунда, жыл саны келгенледен къуралып, «Жаны болгъан сёз» деген клуб ишлейди. Ол клубну келечилери  бу белгили кюнбашында айтылгъан китапхананы къонакълары болгъандыла. Айхай да, къонакъла дагъыда бар эдиле – шахарчыла, китап окъуучула, устазла, Азнорну сурат ишлерин, назмуларын сюйгенле… Сарбаш улу, бу ишге атап, Тырныауузгъа тюрлю-тюрлю заманлада кеси этген суратланы да  келтиргенди. Аланы асламысы Къабарты-Малкъарны ариу табийгъатына аталадыла. Азнор тауланы суратларын къалай уста этгени уа белгилиди.

Тюбешиуню Элбрус районну Библиотека система арасыны директору Тебердиланы Лейля ачханды. Ол Сарбашланы Азнорну жашау эм чыгъармачылыкъ жолуну юсюнден айтханды. «Азнор не жаны бла да фахмулу адамды. Суратларын кесигиз кёресиз. Алада дунияны, бютюнда уа тауланы, ариулукълары толу бериледи. Къарамынгы алалмай тураса, хар бир гитче ызлыкъчыкъда тохтап. Назмулары да, ма бу суратларыча, жюрекге тынч табадыла жол. Хар бир сурат, назму да авторну къол ызын, жюрек урууун сакълагъаны белгилиди. Азнорну чыгъармаларын бир адам да ажашдырлыкъ тюйюлдю. Бюгюн кесигиз да анга шагъат боллукъсуз. Огъурлу кюнде!» – дегенди Лейля Назировна.

Бу тюбешиуде Азнор ары келгенлеге кесини юсюнден толу хапар айтханды. Ол билдиргеннге кёре, назмуланы жыйырма жылында жазып башлагъанды, бюгюн юч назму жыйымдыкъны авторуду. Къарачай-малкъар, къазах, къыргъыз, украин тилледен орус тилге кёчюреди. Биринчи музыка сынауу да назмулары бла бирге туугъанды – ол кесини назмуларына макъам такъгъанды биринчи. Бюгюн аны эллиден артыкъ музыка композициялары барды. Жырларыны авторларыны саны да кёбейгенди.

Чыгъармачылыкъ ишини юсю бла анга берилген соруулагъа Азнор тынгылы жууапла этгенди. Ол окъуу жылларын, биринчи басмадан чыкъгъан чыгъармаларын, анга себеплик этген адамланы да эсгергенди. Акъ сёзюнде энчи тохтап, поэзияны жанр тюрлюлюклеринде къалай ишлегенин, кёчюрмечилик ишни къыйынлыгъыны эм жууаплылыгъыны, сурат ишлерге аны не кёллендиргенин, илхам къайдан келгенин да айтханды.  

Аны бла бирге кезиулеп Ата журтну, уллу дунияда адамны, сюймекликни эм башха кёп затны юслеринден назмуларын да окъугъанды, ишлеген суратларыны тарыхларындан, жашауунда тюбеген сейир адамланы, окъугъан сейир китапларыны юслеринден хапар айтханды. Айхай да, алда ол не умут этгенин да соргъандыла билирге сюйгенле. Сорууланы барысына да Азнор тынгылы жууап этгенди. 

Аны сейир эсгериулерине, ыразылыкъ сёзлерине тынгылай, ары келгенле бу ишге бёлюннген болжалны унутханча болгъандыла. Алай бла тюбешиуню заманы иги да созулгъанды. Ала да окъугъандыла Сарбаш улуну кеслери жаратхан назмуларын. Аны жырларына да сюйюп тынгылагъандыла. Кетерге киши да ашыкъмагъанды. 

«Жаны болгъан сёз» деген клубну келечилери, ала уа жыл санлары келген адамладыла: «Быллай тюбешиуле адабият бла санат тюрлю-тюрлю тёлюлени бирлешдиргенине шагъатлыкъ этедиле. Биз бу сейир, жумушакъ, адепли, илхамлы эм фахмулу адамны бери чакъыргъаны ючюн Тебердиланы Лейлягъа бек ыразыбыз. Быллай башламчылыкълары бла ол дайым бизни къууандыргъанлай турады», – дегендиле. 

Лейля уа, махтауну кесине алып къоймай, бу ишде анга болушханлагъа – 3-чю номерли шахар библиотеканы таматасы Нина Постниковагъа, аны ишчиси Лейля Костинагъа, 2-чи номерли шахар библиотеканы таматасы  Елена Афауновагъа эмда Элбрус районда социал жалчытыуну бёлюмюню ишчилерине, ол санда таматасы Элмырзаланы Лизагъа да, энчи ыразылыгъын билдиргенди. 

Тюбешиу «Тирнекли къартлыкъ» деген программаны къурамында баргъаны уа чыгъармачылыкъ ишде жыл саны бла чеклениу болмагъанын къайтарып эсгертгенди. «Жаны болгъан  сёз» керти да адам жюреклеге жылыу береди эм тюбешиу къууанчланы керелейди.