Алгъышла, насийхатла, жараула да

Озгъан шабат кюн битеу къыралда Россей Федерацияны къырал байрагъыны кюнюне жораланнган жумушла бардырылгъандыла.

Бизни республикада уа ол байрамны белгилеу  Нальчикде Къулийланы Къайсын атлы  проспектде, Жаш тёлюню юйюню аллында майданда башланнганды.  Алайгъа КъМР-ни Парламентини депутатлары, министерстволаны, ведомстволаны, жамауат эмда дин биригиулени, маданият араланы да келечилери,  право низамны сакълаучула, шахарчыла, Нальчикни къонакълары да кёп санда келген эдиле. 
Майданда уллуну, гитчени да къолларында Россейни  юч тюрсюнлю байракълары, шарлары да болгъандыла. 

Байрам Россей Федерацияны эмда Къабарты-Малкъарны байракъларын майданда кенг жайыу бла башланнганды. Къыралны гимни эшитилгенде уа, аны Нальчикде Къырал Музыка театрны солистлери бла бирге жыйылгъанладан кёпле  жырлагъандыла.

Къууанчха келгенлени  КъМР-ни Жаш тёлюню ишлери жаны бла  министерствону бёлюмюню таматасы Аслан Таймуров алгъышлагъанды. Ызы бла россейли байракъны магъанасыны, ол къачан жаратылгъаныны, бояулары нени юсюнден хапарлагъанларыны юслеринден къысха билдириу этгенди. «Барыбызны да  «россейли» деген махтаулу ат эмда деменгили Ата журтубузгъа  сюймеклигибиз бирикдиреди. Туугъан жерибиз мындан ары да айныр, жашнар ючюн, къолубуздан келгенни аярыкъ тюйюлбюз. Алайды да?!»- деп, ол майдандагъылагъа микрофонну узатханды. Ала уа: «Хау, алайды!» - деп къатлагъандыла.

Андан сора уа КъМР-ни сыйлы артисти Азамат Цавкилов, Музыкалы театрны солистлери  Евгений Енин,  Габуланы Зухура  Россейни юсюнден  ариу жырланы айтхандыла, жыйылгъанланы кёллерин бютюн кётюргендиле.

Ызы бла  сахнагъа атлары айтылгъан спортчула чыгъадыла. Аланы араларында Россейни эркин тутушуудан  жыйымдыкъ командасыны баш тренери, беш кере дунияны чемпиону, 2024 жылда  Афиныде бардырылгъан жай Олимпиада оюнланы  чемпиону Хаджимурат Гацалов, «Спартак»-Нальчик»  футбол команданы баш директору, дунияны чемпиону Александр Заруцкий,  грек-рим тутушуудан  Европаны биринчилигинде хорлагъан Осман Шадов,  грэпплингден дунияны кёп кере чемпиону  Мухаммед Урусов, Россейни чемпиону Анзор Закуев,  дунияны эмда Европаны чемпионатларында кёп кере хорлам болдургъан Тимур Бижоев, БРИКС къыралланы араларында  эркин тутушуудан бардырылгъан эришиулени  чемпиону Шауаланы Малик да бар эдиле. 

Спортчула, майданнга келгенлени байрам бла къызыу алгъышлап, жаш адамла  спорт бла кюрешип, къарыулу, саулукълу болургъа итинирге керек болгъанларын да эсгертгендиле. 

«Бу ишни  магъанасы бек уллуду.  Ол  бизни хар бирибизге да Ата журтубузну, аны тарыхын, къырал белгилерин эсибизге салады.  Ата журтха сюймеклик харкюнлюк ишледен башланады.  Спортчу, эришиулеге чыгъып, Россейни намысын къоруулагъанда,  Ата журту ючюн   жууаплы болуу,  къыралына хурмет этиу, аны даражасын не къадар бийикге кётюрюу, дегенча затланы да эсинде тутады. Патриот болуу, жаланда эришиуледе хорлам болдуруу  тюйюлдю, кюнден-кюннге игиден-иги бола барыуду, тутхан ишинги айыпсыз толтурууду, тёгерегингдегилеге хурмет этиудю, къатынгдагъылагъа болушууду, Ата журтунгу кючлеудю»,– деп, аллай насийхат сёзле айтхандыла Хаджимурат Гацалов, Александр Заруцкий эм башха спортчула да.  

Андан сора майданда жаш тёлю,  спортчула да зарядка этгендиле. Ахырында барысы да бирге суратха  тюшгендиле.