Ток баргъан ызланы тазалагъандыла

Быйыл жети айны ичинде «Россети Северный Кавказ» - «Каббалкэнерго» биригиуню келечилери 41,8 гектар чакълы бирде ток баргъан ызланы чырмау салыргъа боллукъ бутакъладан, чырпыладан эм юлкюледен тазалагъандыла. Алай бла 16,2 гектарда 0,4-10 кВ чыбыкъланы эм 25,6 гектрада да 35-110 кВ (уллу вольт) баргъан ызланы игилендиргендиле.

Электрокюч комплекс тийишли халда ишлерча быллай ишлени заманында толтуруу бек магъаналыды. Желле, жауунла кезиуледе  жууукъда ёсген битимлени замыкание этдирирге боллукъдула. Аны хатасындан ток чыбыкъ юзюлюрге, абонентлени элекрокючсюз къойгъандан сора да, бир тюрлю хата салырына къоркъуулуду. 

Бирде ток баргъан ызланы жууукъда ёсген терекледен бла юлкюледен тазаларгъа тынч болмайды. Сёз ючюн, Элбрус бла Черек районлада ток ызла къыйын тау жерле бла барадыла. Аны себепли энчи техника жерине жетерча, жол ачаргъа, башха мадарла да излерге тюшеди, дейдиле «Каббалкэнерго» биригиуде.    

Эсге сала айтсакъ, техника болумларын игилендириу эм ремонт бардырыу программаны чеклеринде жылны ахырына дери энтта да 34,3 гектар тазаланырыкъды.