Къыралны инсанларына къошулгъандыла

Кёп болмай Россейни байрагъыны кюнюне аталып, «Биз – Россейни инсанларыбыз!» деген битеуроссей проектни чеклеринде Басхан муниципал районну школларыны окъуучуларына Россей Федерацияны инсаныны паспорту берилгенди, деп билдиргендиле муниципалитетни администрациясыны пресс-службасындан.   

Алай бла ол кюн окъууда, спортда, чыгъармачылыкъда эм жамауат ишде да, кеслерин айырмалы кёргюзтген онбеш жаш адамгъа эм магъаналы документни эм РФ-ни Конституциясыны китабын да Басхан  муниципал районну  администрациясыны башчысы Адиб Абрегов саугъалагъанды. Къууанч жыйылыугъа эллени таматалары, жамауат организацияланы келечилери эм ата-аналары да къатышхандыла.  

Тюбешиуню ача, Адиб Абрегов окъуучуланы жашауларында эм магъаналы кюнледен бири бла алгъышлай, паспорт къоллу болгъан адам къыралны керти инсаны болгъанын билдиргенди. Аны бла бирге адам  кесине жууаплылыкъ алгъанын, аны законларын сыйларгъа, Ата журтун да сюерге  керегин энчи белгилегенди. Мындан арысында окъууда жетишимле болдурурларын, этген муратларына жетерлерин, ёз районларыны эм къыралларыны да атларын айтдырырларын тежегенди.

Жыйылыугъа келгенлени аламат концерт программа да сакълагъанды. Аны кезиуюнде Тебердиланы Зухура бла Салим Хацуков, «Россия» деген жырны айтып, къараучуланы кёллерин алгъандыла. Ахырында уа жаш адамла эсде къалырча суратха тюшгендиле.