Аракъыны къоркъуусуз ёлчеми жокъду

Россейни Саулукъ сакълау министерствосу 17-23 августда аракъы ичиуню тохтатыугъа жоралагъанды. Ол а ичги бла байламлы жалгъан хапарланы ачыкъларгъа ахшы кезиудю.

КъМР-ни Саулукъ сакълау министерствосуну Психиатрияны бла наркологияны клиника арасыны врачы-наркологу Альберт Кабалоев адамны башын хайран этген ичги затла саулукъгъа хайыр келтиредиле деген ётюрюк хапарлагъа жууап беририн тилегенбиз.

- Аракъыны азчыкъ ичсенг, ол хата келтирмейди, деген хапарны терк-терк эшитирге тюшеди. Алай ол эм уллу ётюрюкдю. Аракъыны къоркъуусуз ёлчеми жокъду. Этил спирт адамны битеу санларын ууландырады. Чагъыр жюрекге игиди деген оюмну терслигин алимле эртте тохташдыргъандыла: ичгиден сора аритмия, гипертония эм кардиомиопатия ауруула башланырыкъларына къоркъуу уллуду, - дейди ол. 

Дагъыда жамауатда багъалы ичгиле учузладан эсе игидиле, саулукъну бузмайдыла, деген хапар да жюрюйдю. Наркологну айтханына кёре, адамны санларына хатаны этил спирт салады, багъасына къарамай. Багъалы коньякда, учуз чагъырда да уула бирчадыла, ала мыйыгъа, жюрекге, бауургъа заран саладыла.  

Ичгиден сора жукъу игиленеди, дегенле да бардыла. Алай, Альберт Султанович айтханыча, аракъы ичгенден сора терк жукъласа да, адам солугъан этмейди, аны мыйысы  ууланыпды.     

- Бирле сыра хата келтирмеген сунадыла. Жай къызыуда суусапны къандырабыз деп, аны ичгенле асламдыла. Алай сыраны бир литринде бла аракъыны 100 граммында этанолну ёлчеми тенгди.  Сыраны, эсиртген затлары аз болгъан башха суусунланы дайым да ичген алагъа юйренчек болуп къалыргъа къоркъуу уллуду, - дейди ушакъ нёгерибиз.

Ичгичилик – аурууду, алай аны багъыуну амаллары бардыла. Сиз неда жууукъ адамыгъыз аракъыгъа, башха уулагъа юйренчек болгъанын сезе эсегиз, мычымай врачха барыргъа керекди, деп ангылатады Альберт Кабалоев.