Жарыкъландырыучуланы даражаларын кётюрюр муратда

Россейни «Билим» биригиую РФ-ни Илму эм бийик билим бериу министерствосу эм РФ-ни Жарыкъландырыу министерствосу профессионал усталыкъны кёргюзтген эки конкурсха заявкаланы алып башлагъанды. Ары къатышыргъа жаш тёлю политика жаны бла кюрешген вузланы къауумлары бла школ устазла-библиотекарьла чакъырыладыла. Ары къошулургъа сюйген 30 сентябрьге дери проектни сайтында заявканы бераллыкъды.

Анда 2-15 адам кирген  команда къураргъа боллукъду. Битеу бирге 7 номинация къураллыкъды: патриот жаны бла юйретиу, чыгъармачылыкъ, добровольчество, спорт, туризм, жаш юйюрле эм усталыкъ сайлау. Дагъыда 4 энчи номинацияла да боллукъдула: жарыкъландырыу иш бла Россейни халкъларыны бирлиги. Хар биринде вуз къуру бир заявканы берирге эркинди, битеу бирге уа ючден кёбюн берирге жарырыкъ тюйюлдю.

РФ-ни илму эм бийик билим бериу министрни  орунбасары Ольга Петрова конкурс бек иги болумланы ачыкъларгъа болушханын эм регионлада жаш тёлю политиканы айнытыугъа кюч бергенин чертгенди. «Билим» биригиуню баш директору Максим Древаль университетле бюгюнлюкде дуниягъа кёз къарамны эмда тири инсанлыкъ ызны къураргъа болушханларын, конкурс а студетлени айныуларына онгла къурагъан командала жанлы болгъанын чертип айтханды.

Экинчи конкурс - «Россейни эм иги школ устазы китапханачысы» - Къыралны Президенти Владимир Путинни буйругъу бла бардырылады. Ары къатышыргъа школда китапханачыла  чакъырыладыла. Алагъа «Билим» биригиуню материалларын хайырланып, окъуучулагъа жарыкъландырыу ишле бардырыргъа тюшерикди. Финалистле Москвада тюбеширикдиле. Хорлагъанланы атларын декабрьде билдирликдиле.

Жарыкъландырыу министерствону таматасы Сергей Кравцов бюгюнлюкде школда китапханачы окъуучугъа билим дуниясына жол кёргюзтюучю эм насийхатчысы болгъанын чертгенди. Ол айтханнга кёре, конкурс бу усталыкъны даражасын кётюрюрге эм ишни иги жанларын кёргюзтюрге керекди.

Эки конкурс да Жаш тёлюню ишлери жаны бла федерал агентствону болушлугъу бла «Жаш тёлю бла сабийле» миллет проектни чеклеринде бардырыладыла. Проектлени официал бетлеринде конкурсну жорукълары бла заявкаланы формалары бардыла. Къабарты-Малкъар Республиканы билим бериу юйлери конкурсха къатышыргъа эмда жетишимлерибизни федерал даражада кёргюзтюрге чакъырыладыла, деп айтылады «Билим» биригиуню билдириуюнде.