Огъурлулукъну тёрелерин бузмагъандыла

«Машук – 2026» битеуроссей жаш тёлю форумгъа къатышхан жюзден аслам адам къанны бла сюек жиликни донорлары болгъандыла.

Тёрели жандауурлукъ акцияны Шимал-Кавказ федерал илму-клиника ара Россейли Къызыл Урест бла бирге бардырады, форумчула да, хар замандача, анга сюйюп къошулгъандыла. Къан алыу станция сау кюнню ишлегенди, «Машукну» «Абадан болуу» бёлюмюнден 79 адамдан хар бири да 450 миллилитр къан бергендиле, битеу да 35 литр. Ол медицина учреждениялагъа жаралы болгъанлагъа, ол санда энчи аскер операцияда ачыгъанлагъа болушуугъа жиберилгенди.

Сюек жиликни регистрин толтуруу да жандауурлукъ ишни баш магъаналы кесеклеринден бириди, анга къатышыргъа хазырлыкъларына шагъатлыкъны 52 инсан этгендиле. Аланы талайы аны бла бирге  къан да бергенлерин бегилерчады. Сагъынылгъан тизмеге 35 жылы толмагъан хар сюйген къошулургъа боллукъду. Быллай донорла болургъа излегенледен 5 миллилитр къан алынады, тинтиледи, сора эсепге салынады. Донорланы саны не къадар кёп жыйылса, къан системаларында къыйын ауруулары болгъан адамланы жашауларын сакъларгъа ол къадар амал да чыгъады.

Огъурлулукъну акциясына къатышыуда сынамыны юсюнден Краснодардан устаз Софья билдиргенди.

- Быллай затлагъа къайгъырып кесими жашауда кёргеним бла байламлы башлагъанма. Университетде окъугъан заманымда устазыбыз авариягъа тюшюп, анга къан керек болады. Халы бек осал эди: аркъа сюегини кесеги бла жан сюеги сынып. Мен да, нёгерлерим бла бирге анга къан берирге сюебиз. Станциягъа келгенибизде анга бизни къаныбыз жарашмаса да, быллай жерле бир бирлери бла байламлыкъла жюрютгенлерин, ол берген къаныбыз башха жерде башха адамлагъа да келиширге боллугъун билдиредиле. Кёп студент жыйылгъан эдик, берилген къанны хайырындан, тюзелирине ышаныу аз болса да, устазыбыз кесине келалгъанды. Кёп заманнга созулгъан реабилитацияны ётюп, жангыдан жюрюп, сёлешип башлагъанды. Аны ючюн бюгюн да къанымы биреуге болушалсам деген акъылда береме, - дегенди ол.

Алтай крайдан жаш тёлю бла ишлеу жаны бла специалист Валерия уа аны къаны аз тюбеген тёртюнчю+ къауумда болгъанны билдиргенди. «Анама аны ючюн къыйыныракъ тюшгенди, мен тууар ючюн окъуна донорланы болушлукълары керек болгъанды. Алгъа жыллада мен кесим бла эгечим тууар, жууукъларым иги болур ючюн бир башха адам къанын берген эди. Алай бла, акциягъа къатыша, борчуму къайтарама дерге да боллукъду», - дегенди ол.

Форумда донор акция «Жашауну саугъала» деген чакъырыу бла ётгенди, бу жол да ол кезиулю кере къан бериу адамланы араларында бир бирге болушууну тынч эм керекли амалы болгъанын кёргюзтгенди. Башламчылыкъны къурагъанла уа бу ишге саулукълу, 18 жылы толгъан хар инсан да къошулаллыгъын чертедиле.