Наркотик сатар умутлары юзюлгенди

МВД-ны «Нальчик» бёлюмюню 2чи пунктуну уголовный розыскыны келечилери оператив-излеу ишни чеклеринде  наркотикле сатаргъа умут этген экеуленни тутхандыла, деп билдиргендиле КъМР-де МВД-ны пресс-службасындан.

Следствияны билдириуюне кёре, 20 эм 25 - жыллыкъ тыш къыраллы инсанла ол затланы Нальчикде жер-жерледе букъдуруп алай сатаргъа умут эте эдиле. Наркотиклени чулгъамлагъа юлюшле этип, жыйырмадан артыкъ жерде къойгъандыла. Алай умутларын толтургъунчу дери аланы полициячыла тутхандыла. Ала битеу чулгъамланы жыйгъандыла, ол экеуленни хуржунларын къармагъанда энтта да аллай 78 хазырын тапхандыла. Ызы бла бардырылгъан тинтиу а ол затла синтетика наркотикле болгъанларын кёргюзтгенди.

Бу инсанлагъа МВД-ны «Нальчик» бёлюмюню 2чи пунктуну следствиясы РФ-ни Уголовный Кодексини 30-чу статьясыны 3-чю кесегине эмда 228.1 статьясыны 4-чю кесегини «г» пунктуна тийишлиликде терслеу иш ачханды.