Банк картасын башхагъа сатхан жууапха тартыллыкъды

МВД-ны «Нальчик» бёлюмюню уголовный розыскыны келечилери оператив-излеу ишни чеклеринде тырныауузчу биреуленни тутхандыла. Ол адам тёлеу затланы законсуз хайырланыуда терсленеди, деп билдиргендиле Къабарты-Малкъарда МВД-ны пресс-службасындан.

Следствияны тергеулерине кёре, 19-жыллыкъ жаш мессенджерледен бирине кирип, кесини эки банк карточкасын танымагъан адамгъа сатханды. Аны ючюн анга РФ-ни Уголовный Кодексини 187-чи статьясыны 3-чю кесегине тийишлиликде уголовный иш ачылгъанды. Ишни сюзюу андан ары барады.

Полиция эсгереди: кесигизни банк картагъызны башхагъа сатыу бузукълукъгъа саналады! Счётларыгъызны ишеклик туудургъан жумушлада хайырланыргъа къоймагъыз. Картагъызны неда банкда «энчи кабинетге» эркинликни башхагъа берсегиз, «дроппер» боласыз. Сизни счётугъузда уа хыйлачыла урлагъан ахча жюрюрге боллукъду.

Женгил ахчаны ызындан къууулмагъыз, кесигизге сакъ болугъуз!