Сюдню оноуу – жазагъа тартыу

Элбрус районну сюдю «шериат патруль» деген экстремист биригиуню  10 келечисине терслеу оноу чыгъаргъанды, деп айтылады ол сюдню пресса-арасыны билдириуюнде.

ФСБ-ны КъМР-де Управлениясы  МВД-ны СКФО-да Баш управлениясыны эмда КъМР-де МВД-ны оператив ишчилери бирге  бу къауумну правогъа къажау ишин тыйгъандыла. Ала кёргюзтген шартланы тюзге санап, сюд быллай оноула чыгъаргъанды:
- ол биригиуню  къурагъаннга энчи низамлы колонияда 7 жыл бла 6 ай  турургъа,  ызы бла уа энтта да 2 жылны эркинликге чыкъмазгъа. Сора анга 3 жылны ичинде интернет-ресурслада таматалыкъ этерге эмда дин жамауат биригиулени ишлерине къатышыргъа чек салынады;
- бирсиле уа энчи низамлы колонияда 3,5-4,5 жыл олтурлукъдула, андан сора энтта да 1 жылны ичинде эркинликде боллукъ тюйюлдюле.

Бюгюнлюкге сюдню оноуу закон бла энтта да кюч алмагъанды, аны себепли апелляция низамда жангыдан сюзюуге къайтарылыргъа боллукъду.