Миллет адетлени сакълай

Октябрь айда Санкт-Петербургда Россейни халкъларыны адетлерин сакълаугъа эмда белгили этиуге жораланып, «Нить культуры» деген ат бла юч кюнню ичинде фестиваль бардырыллыкъды. Аны чекленнген жууаплылыгъы болгъан «Илму-производство технологияла» общество къурайды. Ол кеси да «Биринчилени къымылдауларыны» проектине кёре тийишли болгъан грантына тамамланыллыкъды.

«Нить культуры» фестивалгъа къыралны кёп регионларындан, ол санда Къабарты-Малкъардан, Къарачай-Черкесден, Ингушетия, Дагъыстан, Север Осетия-Алания, Чечен республикаладан, дагъыда къыралны кёп башха регионларындан жаш адамла къатышырыкъдыла. Аланы жыл санлары онекиден башлап, отуз беш жылгъа дериди. Жашланы бла къызланы араларында мектеплени, колледжлени окъуучулары, вузланы студентлери, жаш устазла да бардыла. Фестиваль эки бёлюмден къураллыкъды. «Устала» эмда «Чыгъармачылыкъ фахмулары болгъанла». Биринчи бёлюмге агъачха, къумачха, темирге «жан салгъанла», оюула къурагъанла, абериле этген къол устала, жюнден омакъ затла сокъгъанла, миллет кийимле тикгенлени биригирикдиле.  Экинчиге уа миллет тепсеуледе, халкъ жырлада, макъамла жарашдырыуда, тюрлю-тюрлю халкъ инструментледе согъа билгенле биригирикдиле.

Фестивалгъа къатышыргъа ыразылыкълары болгъанла бюгюнден башлап, сентябрь айны алтынчы кюнюне дери ыразылыкъларын билдирирге тийишлидиле.

Август айны ахыр кюнюне дери фестиваль бла байламлы дистанциялы халда окъутуу-билим бериу иш бардырыллыкъды. Аны кезиуюнде фестивальны къураугъа къатышхан фахмулу адамла мектепчилеге эмда студентлеге онлайн- платформада мастер-классла берликдиле.

Фестивальны ахырында айырмалы болгъанла этген ишледен кёрмючле къураллыкъдыла, уллу концерт программа кёргюзтюллюкдю. Дагъыда жаш тёлюню маданият-патриот жаны бла билимин ёсдюрюуге да эс буруллукъду.

«Душа России» деген сурат конкурс а фестивальда энчи жерни аллыкъды. Сурат конкурсха къошулгъанла ишлерин тёрт номинацияда кёргюзтюрюкдюле.  Ала: «Россейни табийгъаты», «Маданият хазна», «Адамла эм тёреле», дагъыда «Шахар эмда элледиле».

Конкурсха къатышханла жыл санларына кёре эки къауумгъа юлешинирикдиле (12 – 17 жыл эм 18 - 35-жыллары толгъанла). Хорламгъа тийишли болгъанладан отуз алты адам сайланырыкъды. Эм иги суратла уа финалда кёрмючге салынырыкъдыла.

Дагъыда сорлугъу болгъанла: https://nitculture.ru/ сайтха кирип, толу хапар билирге боллукъдула.