Аурууну хорларгъа юйретген дерсле

КъМР-ни Саулукъ сакълау министерствосундан билдиргенлерича, быйыл жылны башындан бери 3897 абадан бла 654 сабий Диабетни школларында билимлерин ёдюрюрге онг тапхандыла.

Бюгюнлюкде Къабарты-Малкъарда  «Узакъ ёмюрлю эм тири жашау бардырыу» миллет проектге кирген «Диабетге къажау туруу» регион  проектге кёре   17 школ барды, аладан экиси сабийле бла ишлейдиле. Дерслени кезиулеринде саусузла  тюз ашаргъа, къанларында бал тузну ёлчемин тинтирге юйренедиле. Андан сора да, алагъа  тири жашау бардырырча эм терк-терк специалистлеге къарата турурча  эсгертиуле этиледиле.  

Сабийлени  уа саусуз тенглерине сакъ болургъа эм биринчи медицина болушлукъ берирге,  башха керек затлагъа  да  юйретедиле.

 Статистикагъа кёре, бюгюнлюкде республикада  эсепде тургъан    саусузланы саны 23 минг адамгъа жетеди. Алагъа  дайым  специалистле кёз-къулакъ болгъанлай турадыла, ол санда  ауруулары онгламазча эм саулукъларын кючлерча   мадарла этиледиле.