Студент къауум сынам алады

Къабарты-Малкъар къырал аграр университетде предприятияланы энергия бла жалчытыу бёлюмюнде окъугъан жаш тёлю «Каббалкэнерго» энергетика предприятияда сынам алгъандыла. Бир айны ичинде ала керти энергетикле бла бирге ишлеп, аладан бу усталыкъны юсюнден кёп затха юйреннгендиле, аны энчиликлерине тюшюннгендиле, деп билдиргендиле «Россети Шимал Кавказ» компаниядан.

Студентле «Эльбрус» атлы урунуу къауумгъа киредиле. Сынам алгъан кезиулери, ол а бир ай эди, аланы урунуу стажларына кирликди.

Предприятиягъа келгенлеринде, алагъа эм биринчиден урунууну къоруулау эмда от тюшюуге къажау жаны бла инструктаж бардыргъандыла. Сора ток ургъаннга биринчи медицина болушлукъ берирге юйреннгендиле, ызы бла насийхатчыланы кёз туураларындан кетмей, бийик вольтлу оборудованияны хайырланыу жорукъларына тюшюннгендиле.

Студентле къуру ишге угъай, компанияны жамауат жумушларына, ол санда волонтёр акцияларына да тири къатышып, сабий юйлеге барадыла, тёгерек-башны тапландырыу бла кюрешедиле, школгъа дери билим берген учреждениялада эмда солуу лагерьледе гитче къауумлагъа электрокючню къоркъуусузлу хайырланыуну юсюнден дерсле бардырадыла.

«Окъуй тургъан усталыгъынга ишни юсюнде тюшюнюу, ол - аламат амалды. Лекциялагъа тынгылау бирди, уллу регионну ток бла жалчытыугъа къатышыу а къайда башхады. Аны себепли бу сынам бизге бек магъаналыды», - дегенди «Эльбрус» къауумну таматасы Ясмин Кильчукова.

«Россети Шимал Кавказ» компанияны объектлерине студентлени хар жыл сайын чакъырадыла. Быйыл СКФО-да бар регионладан 70 чакълы окъуучу сынам алгъандыла.