Таула сансызлыкъны унамагъанларын энтта да эсгертгендиле

Россейни МЧС-ини Къабарты-Малкъарда Баш управлениясындан   билдиргенлерине кёре, 2026 жылны башындан бери республикабызда жолоучулукълагъа 2500 турист бла къаячы чыкъгъандыла. Ала барысы да ведомствода эсепге тюшгенледиле. 

 

Бюгюнлюкде къыралда, ол санда  бизни регионда, туризм терк айнып барады,  Минги тауну тийресинде солургъа сюйгенлени саны асламды. Россейни сегизминглик тауларындан жетиси биздедиле. МЧС-ни Элбрус бийик тау излеу-къутхарыу отряды  аланы барысына да кёз-къулакъ болгъанлай турады. Эм кёп жайылгъан турист жолоучулукъла ётген жерледе къутхарыу къалауурлукъну дайым бардырады.   

 

Быйыл къутхарыучула болушлукъгъа 48 кере чакъырылгъандыла, 55 адамны ёлюмден сакълагъандыла, алай, жарсыугъа, 11 инсанны жашауларын къутхарыргъа къолдан келмегенди. Излеу ишле бийик таулада къыйын хауа болумлада  бардырылгъанларын да белгилерчады. 

 

Ведомствода айтханларыча, солууларын таулада, къаялагъа ёрлей ётдюрюрге сюйгенлени араларында  уллу кёллюлюк этгенле  да бардыла. Палахдан сакъланыр ючюн, ала, бек биринчи, жолоучулукъларын эсепге тюшюрюрге, кюнню халы къалай тюрлениригине къараргъа, не тюрлю чурумлагъа тюберге боллукъларын тергерге, алагъа кёре экипировканы да алыргъа тийишлидиле. Къоркъуулу жерледе тынгылы страховканы хайырланыргъа, жолгъа чыкъгъанда,  спутник телефонну неда GPS-трекерни алыргъа, къыйын болумгъа тюшгенде,  мадарланы юсюнден алгъадан сагъыш этерге керекди.