Таза суу бла къытлыкъ сынамазча

Былтыр «Жашау этерге инфраструктура» деген  миллет проектге кёре Нальчикде таза суу бла жалчытхан «Головной» водозаборну эм  сууну тазалагъан станцияны да жангыртырча ишле башланнгандыла. Ала юч жылны ичинде бардырыллыкъдыла эм алагъа 1,8 миллиард сом къоратыллыкъды, деп билдириледи КъМР-ни Къурулуш эмда жашау журт-коммунал мюлк министерствосуну пресс-службасындан. 

Суу жыйылгъан баш объект шахарчыланы, федерал магъаналы курортну, тёгерегинде эллени, саулай да 17,5 мингден артыкъ  адамны ичер суу бла жалчытады.  

Ол 1962 жылда ишленнгенди. Андан бери адам санына иги кесек къошулгъаны себепли, ол арт заманлада борчун тынгылы толтуралмайды. Аны хатасындан майдан башлап «Нальчик» курорт бла тёгерегинде элле суу жетмей къыйналадыла. Сёз ючюн, проектге кёре ол 700 минг кубометр бла жалчытыргъа керек эсе, бюгюнлюкде жаланда 70-80 минг кубометр береди. Аны бла байламлы жайда сууну график бла берирге тюшеди.  

Бюгюнлюкде объектде мурдорун салып бошап  диспетчер служба, лаборатория эм башха бёлюмле орналлыкъ  административ-техника корпусда  бетондан чыпынларын къуюп,  къабыргъаларын къалап кюрешедиле. Жууукъ  заманда специалистле ара залда  сууну тазалагъан оборудованияны  темирден къаркасын да жарашдырып башларыкъдыла.   

Проект жашауда бардырылса,  жууукъда орналгъан элле  таза суу бла толусунлай жалчытыллыкъдыла. Аны бла бирге курортну айнырына себеплик этилликди. Анга кёре къонакъ юйлени, санаторийлени эм башха объектлени да санына танг кесек къошуллукъду.