Сабий къауум токдан хата кёрмезча

«Каббалкэнерго» предприятияны башламчылыгъы бла республиканы орта школларында лагерьледе эмда санаторийледе электрокючню къоркъуусуз хайырланыуну юсюнден дерсле бардырыладыла. Жай айлада сабийлени солуу кезиулери болгъанлыкъгъа, энергетикле бу теманы магъанасын эсде тутуп, эсгертиуле этиу, юйретиу, ангылатыу ишни селейтмезге таукелдиле, деп айтылады компанияны билдириуюнде.

Элбрус районда электрокюч сетьлени келечиси Оксана Солдатенко кёп болмай Нальчикде «Тейри къылыч» сабий социал-реабилитация арада аллай дерс бардыргъанды. Ол айтып, сабийле электрокючню юсюнден кёп зат билгендиле: ол къачан къоркъуулу болгъанын, энергетика объектлени къатларында ойнаргъа неда от этерге нек жарамагъанын, ток ызланы чыпынларына ёрлеселе эмда жерге тюшген чыбыкълагъа тийселе игиге келтирмезлигин, электрокюч бла ишлеген приборланы къоркъуусуз хайырланыуну жорукъларын да. Компанияны келечиси сабийлеге «атлам ток» къаллай болгъанын ангылатханды, электрокюч ургъан адамгъа биринчи медицина болушлукъ къалай берилгенин да кёргюзтгенди.

Сабий къауумгъа «Гоша» деген тренажёр-робот бла ишлеу бютюнда сейирли кёрюннгенди. Аны юсюнде ала электрокюч ургъан адамгъа биринчи болушлукъ берирге юйреннгендиле, «Маша Лампочкина» суратлау фильмге къарап,  токну къоркъуусуз хайырланыуну жорукъларына тюшюннгендиле.

«Жыл сайын битеу республикадан юч мингден артыкъ сабий бизни арада кеслерини саулукъларына къаратадыла. Электрокючню къоркъуусузлугъуну юсюнден дерслени бардырыу ахшы тёреге айланнганды: ала хар сменде ётедиле. Энергетикле бла байламлыкъла жюрютюлгени себепли гитче къауум токну жаланда хайырлылыгъыны юсюнден угъай, ол, уллу кёллюлюк этсе, нечик къоркъуулу болгъанын да биледиле», - дегенди «Тейри къылыч» араны педагогика бёлюмюню башчысы Глашланы Зухура.