Терекле орнатыллыкъдыла

Быйыл Къабарты-Малкъарда  агъачланы жангыртыу жаны бла программагъа кёре 103,5 гектарда терекчикле орнатыллыкъдыла, деп билдириледи КъМР-ни Башчысыны Администрациясыны МАХ-да каналында. 
Бюгюнлюкде тийишли ишле 38,26 гектарда тамамланнгандыла. Алай бла кюз артындан кеч къалмай энтта да  65,24 гектарда агъачны  айнытырча мадар этилликди.
Эсге сала айтсакъ, жыл сайын «Каббалклесопитомникде» терек бла юлкю зыгытла жетерча ёсдюрюледиле. Аланы иги кесеги агъач фондну айнытыргъа хайырланылады.
Агъач мюлкню келечилери, тереклени орнатыу бла чекленип къалмай, тири къармашып, агротехника жаны бла жумушланы да тынгылы толтурадыла. Быйыл аллай ишле 1536,6 гектарда бардырыллыкъдыла. Бусагъатда  аланы ючден бири тамамланнганларын да  белгилерчады. 
Саулай алып айтханда, агъачланы айнытыу эм агротехника жумушланы тамамлау жаны бла проектге федерал бюджетден 11,07 миллион сом чакълы бёлюннгенди.