Болжалдан кеч къалмай

Быйыл  эллерибизде жолланы жангыртыу жаны бла аслам мадар этиледи. Ишле «Жашау этерча  инфраструктура» миллет проектни чеклеринде бардырыладыла. Мектеплеге, медицина учреждениялагъа, социал службалагъа эмда ишчи жерлеге элтген жолланы жангыртыугъа баш магъана  бериледи. Битеу ол мадарла  – элледе аланы эмда районланы  транспорт байламлыкълары  къоркъуусуз   болурча этергеди, дегендиле КъМР-ни Транспорт эмда жол мюлк министерствосунда.
Тапландырыу ишле бардырыла тургъан объектледен бири Чёрная Речка эмда Благовещенское эллени араларында 12,6-километрлик жолду. Специалистле аны мурдорун жарашдырыу бла кюрешедиле эмда бир къат асфальт жая турадыла.
Эски Черек – Жемтала – Сукан-Суу жолда да ремонт ишле ахырына  жетдирилгендиле,  дерге боллукъду. Этиле тургъан мадарланы хайырындан ол бютюнда къоркъуусуз, тынгылы эмда сыйдам боллукъду. Подряд организацияны адамлары анда да бир кере асфальт жайып чыкъгъандыла, энди жолну жанларын кючлендириу бла кюрешедиле.
Республикада эм узакъ эмда аз адам жашагъан элледен бирине – Хамидиеге - энчи эс бурулады. Анда жолну эки участкасын жангырта турадыла, чыракъла эмда жорукъ  белгиле да орнатадыла.
Алай бла сагъынылгъан ишлени хайырындан элледе жашау болум, транспорт онгла да шёндюден эсе игирек боллукъдула. Проектле барысы  да болжалындан кеч къалмай  тамамланыладыла, деп ышандыргъандыла министерствода.