Къабарты-Малкъарда миллет проектлени, федерал эм регион программаланы толтуруу андан ары бардырылады. Быйыл жаланда миллет проектле бла байламлы ырысхы рекорд 14,3 миллиард сом болгъанды. Аладан 11,7 миллиард сом федерал бюджетде салыннганды, 2,6 миллиард – республикалыда.
Президент Владимир Владимирович Путинни башламчылыгъы болгъан миллет проектлени онглары толусунлай хайырланадыла.
Баш ыз, сёзсюз, социал жаныды – билим бериуню, саулукъ сакълау, маданият, спорт, социал махкемелени жангыртыу, дагъыда инфраструктураны. Бусагъатда ишлене эмда тынгылы ремонтлары бардырыла тургъан, быйыл хайырланыугъа бериллик объектлени юсюнден айтады КъМР-ни Башчысы Казбек Коков МАХ-да энчи каналында.
Ишлене тургъанладан эм уллусу 250 жатар жери болгъан Республикалы онкология диспансерди. Терс-Къолда 150 жери болгъан жангы мектепни да хайырланыугъа бериллиги сакъланады, Баксанёнокда 140 жери болгъан сабий сад, Прималкинскоеде бла Заюковода уа тиширыу консультацияла.
Тынгылы ремонтну объектлери – Кёнделенде амбулатория, Нальчикде 3-чю номерли поликлиниканы бёлюмю, Чегем район ЦРБ-ны Нартанда поликлиника бёлюмю, 38 мектеп, школгъа дери билим берген 6 махкеме, гуманитар-техника эмда агропромышленный колледжлени окъутуу корпуслары, юч китапхана.
Тапландырыу жаны бла жумушла – уллу жангы объектле: сквер-музей, Хорламны паркы, Нальчикде алгъын эт жарашдырыучу комбинатны тийресинде сквер, «Шахар жибермейди» Чегемде, Майскийде «Парк «Заря».
Асламысында была хазна хайырланылмай тургъан жерле эдиле, энди мында жаш тёлюге, сабийлери болгъан юйюрлеге, абаданлагъа эмда физкультураны сюйгенлеге шёндюгюлю солуу тийреле къураллыкъдыла. Дагъыда районлада 45 жамауат тийреле да тапландырыллыкъдыла.
Сёзсюз, жолла. Жол-улоу ызны айнытмагъанлай, экономиканы планын этген къыйынды. Быйыл бизде 100 объект барды, федерал трассаланы 30 километрге жууугъу, регионнукъуладан 80 километрден артыкълары эмда муниципал жолланы 25 километри тийишли халгъа келтирилликдиле.
Нальчикде уа быйыл жол ишле бардырылгъан участкаланы битеулю узунлукълары 44,5 километр болгъанды. Бери кварталланы араларында проездле да киргендиле – Кенже эм Хасанья эллени, Александровка, Горная, Стрелка микрорайонланы орамларында тийреле къошулгъан энчи республикалы программа бардырылады.
