Къанатлылагъа эм къоркъуулу арууладан бири

Къабарты-Малкъарны Ветеринария управлениясында юй къанатлылагъа жукъгъан грипп аурууну (кесеклени) профилактика жорукъларыны, тинтиуню, жайылыууна чек салыуну юслеринден айтхандыла.

Юй эм кийик  къанатлылагъа  жукъгъан  ауруу   къан тамырланы, солуу органланы, аш орунну эм  нерва системаны да  бузады эм кёбюсюнде ёлюмге келтирирге болады.  

Ауругъан къанатлыны халинден да  билинеди.  Ол мугурайып, ашдан, суудан да айырылады, кеси аллына  жюрюялмайды, ичи ётеди, териси,  башы да кёксюлдюмге тартады,  солууу  иги айланмайды, къалтырауукъ тиеди, тюклери кёпчюйдю,  жумуртха чыгъармайды, юсюнде ринит, конъюктивит дегенча шартла да эсленедиле.  Къанатлылагъа эм адамгъа да кесекле бирси къанатлыладан, адамдан  эм  продуктладан да  жугъады. Аны себепли этин иги биширирге эм жумуртхасын да  тазаларгъа тийишлиди.

Сагъынылгъан кесекледен адамны иммунитети болмагъаны себепли, ол жукъса, кимни да онгсуз этерчады. Сёз ючюн, саусузну  терк окъуна  температурасы кётюрюледи, солууу айланмай башлайды, тамагъы, шаугютлери ауруйду эм  кёзлерини ичи кичитеди.   Алай бла къанатлылагъа къарагъаныгъыздан сора, сагъынылгъан шартладан бирлери ачыкъланса, созмай врачха барсагъыз игиди.

Юй къанатлыла тутхан мюлкледе  къоркъуусузлукъ сакъланырча бу жорукъланы бузмазгъа керекдиле:  идентификация бардырыргъа; жабыкъ жерде тутаргъа; билмеген жеригизден къанатлы, мирзеу да алмазгъа; багушларын, тюклерин да тийреде жаймазгъа; заманында дезинфекция бардырыргъа;    къырал ветеринария службаны келечилери келселе, къанатлылагъа къараргъа къояргъа; къанатлыланы халлери осалына тюрленнгенини юсюнден службагъа бир суткадан кеч къалмай билдирирге; службаны профилактика, диагностика, чек салыу, карантин кийириу буйрукъларын толтурургъа; юй къанатлыла хайырланнган  орунлагъа кийик къанатлыла неда  гылыула  киралмазча мадар этерге.

Къанатлылагъа кесекле жукъгъандыла деп ишекли болсагъыз, мычымай Къабарты-Малкъар Республиканы къырал ветеринария службасына билдиригиз. Аны адреси: Нальчик, Ленин атлы проспект, 54, телефон номерлерии: 8 (8662) 40-64-38,  8 (8662) 40-54-35