Миллет ашарыкъла жаны бла даражалы байрам

Быйыл 15-16 агустда  Долинск тийресинде  «Хасания» стадионунда  хычиннге усталаны тёрели чемпионаты боллукъду.  Анда хорламгъа тийишлилени  ахча саугъа сакълайды  500 минг сом чакълы.

Ол кюн хар къауум,  арбазчыкъла къурап,  хычин биширгенлеринден сора да,  концерт программа, ярмарка, мастер-классла, дагъыда кёп башха сейирлик затла бардырыллыкъдыла.

Эришиуле эки кесекден  къураллыкъдыла: «Устала» эмда «Профессионалла». Биринчиге  хычин эте билген ким да  къатышыргъа боллукъду, башхасында уа  ресторанланы  бла кафелени  аш этиучюлери  усталыкъларын ачыкъларыкъдыла. 

Алай бла биринчи жерни алгъан – 100, экинчи – 50 эм ючюнчю 30 минг сомгъа тийишли боллукъду. Аны бла бирге «Профессионал» категорияда хорлагъанланы саугъалары уа байрамгъа дери ачыкъ этиллик тюйюлдю. 

Хасанияны администрациясында айтханларына кёре,  «Тауланы чомартлагъы»  номинацияда къонакъланы эм иги  сыйлагъан эм къол кётюрюуде хорлагъан  къауумлагъа да   аламат  саугъала берилликдиле.   

Андан сора да, конкурсда «Мен хычинни нек сюеме эм аны бла байламлы байрамны нек сакълайма» деген темагъа жораланнган айырмалы видеороликни   тюшюрген  ючеулен саугъаланырыкъдыла.

Эсге сала айтсакъ, былтыр байрамгъа къараргъа келгенлени саны 10 минг адамгъа жетгенди. Быйыл акцияны къурагъанла эм азындан 30 минг адамны сакълагъанларын билдиргендиле.