Инфляция аз-маз шошайгъанды

Быйыл июнь айда Къабарты-Малкъарда багъала, май ай бла тенглешдиргенде,  бир процентге ёсгендиле. Ол санда аш-азыкъ учузуракъ болгъанды, продовольствиягъа саналмагъан товарланы эмда жумушланы багъалары уа кётюрюлгенди, деп билдиргендиле Россейни Банкыны регионда бёлюмюнден.

Аш-азыкъны юсюнден айтханда, бегирекда тауукъ жумуртхала учуз болгъандыла. Жай жылыу келгени бла аланы производствосу кебейгениди аны сылтауу. Тергеулеге кёре, сары жау да азыракъ туруп башлагъанды. Ол да,  жумуртхалача,  жылны кезиуюне кёре асламыракъ болгъанды, аны чыгъаргъан предприятияланы къоранчлары да азайгъандыла. Дагъыда рынокда андан иги кесек къыстырыкъ этилгени кёрюнеди.

Кофени багъасы да тюшгеннге ушайды. Аны ёсдюрюу бла кюрешген къыраллада тирлик быйыл бай боллугъу ючюн халкъла аралы рыноклада кофе учузуракъ туруп башлагъанды.

Жумушла бла жалчытыуну юсюнден айтханда, таксини багъасы кётюрюлгенди. Машиналагъа къарауну эмда отлукъну багъалары кётюрюлгени ючюн бу иш бла кюрешгенле кеслерини къоранчларын хайырланыучуланы бохчаларына кёчюргендиле. Тыш къыраллада солуу да багъа болгъанды. Жайда кёпле ишлеринден солур заманнга чыкъгъанларын эсге алсакъ, ол да сейир болмаз.

Продовольствие болмагъан товарла дегенде уа,  бегирекда улоу отлукъну багъасы кётюрюлгенди. Бир жаны бла сурам кёбейгени, башха жаны бла уа аны производствосу азайгъаны сылтауду алай болгъанына.

Теле-радиотоварла эмда связь средствола энтта да учузуракъ болгъандыла. Тергеулеге кёре, ол адамла кредит алыуну азайтханлары бла байламлыды.

Къабарты-Малкъарда жыллыкъ инфляция 5,96 процентди. Саулай къыралда кёрюмдю бла тенглешдиргенде, андан азыракъды. Болсада Россейни Банкы аны андан ары тюшюре кетип, тёрт процентге жетдирирге кюреширикди.