Кёллендирген сёзле бла бирге ышаннгылы амалла да

Москвада окъуу юйлени быйыл  бошагъанланы битеуроссей студент байрамларын къурагъанладан бири «Россей – онгланы къыралы» Президент платформаны «Сени жюрюуюнг» атлы проектиди. Къууанчлы тюбешиуге беш жюзден аслам жаш бла къыз къатышхандыла. Аланы санында уа  Къабарты-Малкъарны келечилери да болгъандыла.

Битеуроссей студент байрам – 2026 эм алгъа саулай  да къыралда  быллай ингирни бардырыу тёреге тутхучлулукъ этиу бла  къуралгъанды. Аны бла бирге уа ол жашла бла къызла окъуп бошагъан билим берген махкемелери эмда регионла бла байламлыкъны сакъларларына къайгъырыулукъ бла да къуралады. Андан сора да, аны мураты Россейни халкъларыны бирликлерини жылында жаш тёлю бирлешмени айныуу бла байламлыды.

Жыйылыу, жаланда байрам халда угъай, ары келген жаш тёлю кесини жетишимлерин, окъугъан университетин, къыралын эмда регионун айнытыугъа къошхан юлюшюн сезерча, майдан халда къуралгъанды. Анга деп жарашдырылгъан «Келир заманны кючю» деген белги уа байрамны баш магъанасын: къыралны тамблагъы кюнюн бюгюннгю студентле къурарыкъларын ачыкълагъанды.

Къыралны бийик окъуу юйлерин бла колледжлерин бошагъанла «Россия» атлы миллет арада жыйылгъандыла жашауларыны магъаналы кезиулерини жетишимлерин белгилерге. Байрамда, аланы алгъышлай, «Россей – онгланы къыралы» Президент платформаны таматасы Андрей Бетин сёлешгенди.

– Россейни студентлерине  окъууну бошап, диплом алыу усталыкъ эмда айныу бла жангы жолну башланыууду.  Бюгюнлюкде жаш адамла билим аладыла, проектле хазырлайдыла, илму,  волонтёрлукъ, чыгъармачылыкъ эмда спорт бла кюреше,  кеслерини регионларын айнытыу бла бирге къыралны айныууна  да юлюшлерин къошадыла. Ол а, кертиси бла да, «Келир заманны кючюдю». Беш жылны ичинде «Сени  жюрюуюнг» студент проектге эки миллиондан иги да аслам адам къатышханды. Ол тарихле уа – ала башламчылыкъла, ёсюуню эсеплери, сезилирча тюрлениуледиле. «Россей – онгланы  къыралы» Президент платформаны борчу уа жаш адамлагъа айныу амалланы къурауду, аланы насийхатчыла бла бирикдириудю эмда башламчылыкъларына тутхучлулукъ этиудю, – дегенди Андрей Бетин, жыйылгъанланы алларында сёлеше.

Белгиленнгенича, битеуроссей студент байрамгъа бизни республикадан да быйыл окъуу юйлени бошагъан жашла бла къызла къатышхандыла. Аланы санында уа Къабарты-Малкъар университетни тауусхан Байсолтанланы Амина, Улбашланы Лиза, Тембулат Урсуков, Элдар Озроков да бардыла.

Байрамны чеклеринде билим бериу программа да къуралгъанды. Анга уа форсайт-сессия да киргенди. Аны кезиуюнде жашла бла къызла бюгюнлюкде билим бериуге къошумчулукъ этген башламчылыкъланы, жаш тёлю медианы юслеринден оюмларын айтхандыла, кёз къарамларын билдиргендиле.

Къабарты-Малкъардан баргъанлагъа байрамны ол халда къуралгъаны уа бирси субъектледен келгенлени сынамлары бла  шагъырейленирге эмда башламчылыкъланы юслеринден оюмланы республикагъа келтирирге онг болгъанды. Энди уа ол жангычылыкъланы  иш юсюнде хайырланыргъа жарарыкъды.

Программаны бир кесегин онлайн халда кёрюрге амал да бар эди. Башха-башха регионладан анга къарагъанла «Сени жюрюуюнг Дебаттл» энчи проектни ушагъына къошулургъа онг да тапхандыла эмда билим бериуню юсюнден сёлешгендиле. Андан сора да, жер-жерледен окъуу юйлени келечилери жаш тёлюню алгъышлагъандыла.

«Россия» миллет арада, андан сора да, байрамны чеклеринде «Биринчи курсда окъугъанлагъа письмо» деген акция да къуралгъанды. Мында уа окъууну бошагъанла энди студент боллукълагъа алгъышларын айтхандыла. Алай бла уа бу жумуш тёлюлени араларында байламлыкъгъа да себеп болгъанды.

– Битеуроссей студент байрам – ол жаланда университетни бошауну омакъ халда къурап бардырыу тюйюлдю. Бу кезиуде артха къарап, анча заманны ичинде не жумушланы тамамларгъа, къаллай жетишимлеге жетерге онг болгъанын, студент жылла бизни хар бирибизни да къалай тюрлендиргенлерин жангыдан эсибизге тюшюрюрге боллукъбуз. Бюгюн бу байрам саулай да къыралны жаш тёлюсюн бирикдиргенди, алай эсе уа, тарыхны, оюмланы, жетишимлени, муратланы да бирикдирликди. «Сени жюрюуюнг» деген проект ючюн а окъуу жылланы кезиуюнде жаш адам студент бирлешмеге толусунлай  къошулургъа тийишлиди. Бюгюнлюкде энди  проектни къауумлары Россейни 82 субъектинде, Абхазия Республикада ишлейдиле эмда  аланы иш кёллюлюклери, башламчылыкълары себепли айныу да сезилгенлей турады. Хар биригизге да тюрлениуледен  къоркъмай, ахшы жетишимлеге жетеригизни сюйгеними билдиреме. Окъуу жылларыгъызда алгъан билимигиз ышаннгылы мурдор болгъанлай  къалсын, къатыгъызда уа хар заманда да ала бла бирге ишлерге, айныргъа да сюйген адамларыгъыз болсунла, – дегенди «Сени жюрюуюнг» проектни башчысы Юлия Епифанова.

Байрамны экинчи кюнюнде анга къатышханла усталыкъланы энчиликлери  бла шагъырейленирге, ишчиле не бла кюрешгенлерине тюшюнюрге онг тапхандыла. Жашла бла къызла Сберни, VK-ны бёлюмлеринде болгъандыла, шёндюгюлю корпоратив энчиликлеге, бусагъатда ырысхы бла байламлы ызлада хайырланылгъан тарихли амаллагъа да юйреннгендиле.

РЖД-ны майданларында да энчи программа къуралгъанды: жаш адамла, сёз ючюн, музейде да болгъандыла, анда уа темир жол бёлюм бюгюннгю айныу бла къалай байламлы болгъаныны тарыхын билгендиле. Къабарты-Малкъардан баргъан выпускниклеге уа быллай экскурсияланы хайырлары бла  къыралны эм уллу, белгили да иш бериучюлерини бусагъатдагъы излемлери къаллайла болгъанларын  ангыларгъа эмда кёрюрге онг чыкъгъанды. Аны бла бирге уа, ала усталыкъда айныр ючюн, федерал эмда  республика даражалада къаллай амалла барлыкъларын тенглешдиргендиле, аслам ызда сынамгъа да тюшюннгендиле.

Байрамны, «Россей – онгланы къыралы» Президент платформадан сора да, РФ-ни Илму эмда бийик билим  бериу министерствосу, Жаш тёлюню ишлери жаны бла федерал агентство, «Билим» россей жамауат организация эмда «Россия» миллет ара къурагъандыла эмда бардыргъандыла.