Юйюрлени насыпларын керелейди

Июльда Россейни тиширыу ауруулагъа бакъгъан врачлары кеслерини усталыкъ байрамларын белгилейдиле. Ол а 2020 жылда  тохташдырылгъанды. Нек дегенде 1803 жылны июль айында Санкт-Петербургда аначылыкъны школу биринчи кере ачылгъан эди. 
Бизде да акушер-гинекологла болуп, сайлауларына кертичилей къала, кёпле ишлейдиле, жамауатдан ыспасха тийишли да боладыла. Айхай да, аны ангыларгъа къыйын тюйюлдю: аллай врачларыбыз юйюрлеге сабий къошулууну насыбын бередиле. Аланы санындады Жуболаны Мадина да.

Саулукъ сакълауда отуз жылдан асламны ишлей, ол кёпледен ыспас сёзлени эшитгенди. Анга ыразылыкълары болгъан юйюрле уа, жаланда республикабызда угъай, къыралыбызны жер-жерлеринде да жашайдыла.

Тырныауузда ёсген къызчыкъ акъ халат киерге, врач болургъа гитчелигинден да сюйгенди. Анга аллай мурат а кеси аллына келип да къалмагъанды: ол экиге айланнган къарындашы сынамлы хирург Байзуллаланы Ахматны къалай ишлегенин, жууаплылыкъ сезимин да кёре, анга ушаргъа талпыннганды. Айхай да, къадар ол насыпны анга да саугъалап, ол умутуна жетген да этгенди.

Атасы Текуланы Амин да, къызчыкъны саулукъ сакълаугъа итиннгенин кёре, аны сейирин бютюн кючлей, узакълагъа иши бла баргъан жерлеринден илляу шприцле, дарманла, башха абериле да келтирип тургъанды. Мадина уа аланы бирси оюнчакъларындан энчи кёргенди эмда багъалагъанды. Гинжилерине, жумушакъ илляуларына ала бла «бакъгъанды».

Мектепде да ол айырмалы окъугъанды, анга химия, физика, биология эмда математика дерсле бютюн женгил берилгендиле. Школну жетишимли бошап, КъМКъУ-ну «Багъыу иш» бёлюмюне киргенинде уа, анга мектепни айырмалы тауусханы ючюн, тёрт угъай, эки сынаугъа барыргъа эркинлик берилгенди. Алай бла ол химиядан бла физикадан «бешле» алып, университетге окъургъа да киреди. 

– Биз мектепге жюрюген кезиуде «репетитор» деген ангыламны не болгъанын да билмегенбиз. Устазларыбыз нени окъутсала да, аны билгенбиз. Аланы уа билим даражалары ышаннгылы эди, ала да, университетде преподавательлерибиз да иги окъутхандыла, барысы да сау болсунла, – деп билдиреди ыразылыгъын ушакъ нёгерим.

«Багъыу ишни» тёртюнчю курсунда  Мадина, Жуболаны Аслан бла къадарын байлап, бир юйюрлю болады. Алай эсе да, медицинада окъугъан тынч болмагъанын ангылагъан къайынлары анга себеплик этгенлей, ол окъуууна сакъ, жууаплы болуруна къайгъыргъанлай тургъандыла. Юйюрню насыбын керелей, анга жашчыкъ къошулгъанында да, сабийге къарагъанны ауурлугъун анасына таяндырмагъандыла. Эки жанындан ыннала къолларындан келгенича болушуп, Мадина окъугъанын тохтатмагъанды. Аны ючюн а ол бюгюнлюкде къайын атасы Жуболаны Салихге бла къайын анасы Зоягъа бютюнда ыразыды.

Алай бла, КъМКъУ-ну бошагъанындан сора да, интернатураны аны кесинде аначылыкъ эмда тиширыу ауруула ызны кюндюзгю бёлюмюнде окъугъанды. Анда билимин ёсдюрюп, ызы бла Нальчикни экинчи номерли поликлиникасыны тиширыулагъа консультация берген бёлюмюнде урунуу жолун башлайды. Жуболаны келинлерине ол кезиуде республикабызда кёп ишлерге тюшмеген эсе да, аны усталыкъ жаны бла хунери тынгылы болгъанына уа жамауат тюшюннген эди.

Энди бюгюнлюкде Мадина Аминовна Нальчикде «Инимед», «Саулукълу тёлю» клиникалада акушер-гинекологду, репродуктологду. Алай эсе да, ол эм алгъа аскер къуллукъда ишлеген баш иеси бла бирге Астраханьнга кетгенди. Юйюрде ол кезиуде энди сабийле да эки болгъандыла, кеслери да мектепге жюрюгендиле. Мында уа ала беш жылдан асламны тургъандыла.

Окъууун-билимин тийишлисича хайырлана, Текуланы къызлары узакъ жерде да бош турмагъанды. Астраханьны къырал медицина институтунда ординатурагъа киргенди. Анда заочно окъуй, шахарны сабийле тууучу биринчи номерли юйюнде ишлегенди. Мында акушер-гинеколог болуп, ахшы сынам да жыйышдыргъанды.

Бир ауукъ замандан а Жуболаны юйюрлерине Хабаровск шахаргъа кёчерге тюшеди, мында ала онбеш жылдан асламны тургъандыла. Ол кезиуде уа энди Дамир да студент эди, Москвада юристге окъугъанды. Лаура алыкъа алтынчы классха жюрюгенди. 

Мында Мадина Аминовна перинатал арагъа ишге кирген эди, ара уа, жаланда шахарны угъай, саулай да Хабаровск крайны жалчытханды. Анда ишлеген врачлагъа уа бу тийрени эм узакъларында орналгъан эллерине, шахарларына барыргъа да тюшеди, таулу къыз да аланы биргелерине саусузлагъа самолёт бла да кёп кере учханды.

Айхай да, аллай кезиуледе ананы, сабийни да жанларын сакълап къалыр ючюн кюреш бардырыргъа тюшген чакъла аз болмагъандыла. Бирде алагъа болушлукъну жашагъан жерлеринде берип, артха тынч-ырахат къайтыр онг чыкъса да, бирде уа, аланы жашауларына къоркъуу болуп, перинатал араны кесине мычымай жетдирирге керек да болгъанды. Алай эсе да, хар къайсы кезиуде да таулу тиширыу билимине, сынамына да ышаннганды.

Хабаровскда ишлей, Мадина Аминовна къагъанакъла заманларындан алгъа туугъан, кёп жылланы ичинде юйюрге сабий къошулмагъан дегенча жарсыулагъа энчи эс буруп, репродуктология ыз жаны бла билимин ёсдюргенди. Алай бла ол беш, жети, он, андан да кёп жылланы ана болур насыпны сакълагъан тиширыулагъа аллай насыпны сынарларына себеплик да этгенди. Бюгюнлюкде таулу тиширыугъа бу жаны бла, белгиленнгенича, Хабаровск крайдан, Астраханьдан да кёп юйюрле ыразыдыла.

Жуболаны юйюрлери энди Нальчикге къайтханлы талай заман озгъанды. Сынамлы акушер-гинеколог эмда репродуктолог Жуболаны Мадина мында да ишин къоймагъанды. Айтханыбызча, бюгюнлюкде «Инимедде» бла «Саулукълу тёлюде» жарсыулары бла келген тиширыулагъа болушлугъун аямайды. 

Эки клиникада ишлей, жамауатдан ыспасха тийишли болгъан врачны бош заманы аз къалгъаны сейир тюйюлдю. Алай эсе да, ол туудукъларына заман табады, аланы къатларында тургъан кезиулеринде насып неде болгъанын бютюн сезеди. Аиша энди бешинчи классха барлыкъды, биологияны жаратады. Эмирге алыкъа жылчыкъ толгъанды. Ынналары Мадина уа, алагъа тилекле эте, юйюрге дагъыда жашчыкъла, къызчыкъла да къошулурла деген ахшы муратын жюрегинде сакълайды.