Муратлары - сабийлени къыйын болумлада хатадан сакъларгъа

«Розовый фламинго» санаторийде от ёчюлтюу жаны бла  дерсле бардырылгъандыла. Ала къутхарыучуланы кёп адамла жыйылгъан жерде от ёчюлтюуге  усталыкъларын игилендирир мурат бла къуралгъандыла. Бек биринчи юйрениу халда мекямны ичинден адамланы кёчюрюу ётгенди. Устазла сабийлени къоркъуусуз жерге элтип, аланы хар бирини да атларын айтып, барысы да келгенлерине тюшюннгендиле.

Дерлени къурагъанланы муратларына кёре, мекямны биринчи къатысында от тюшгенча этилгенди, эки адам а юйню ичинден чыгъар жолну табалмай къалгъандыла. МЧС-ни чакъырылгъан жерге машиналары бла келген къутхарыучула, бир бирлери бла келишип, терк къармашып, автоцистерналадан быргъыланы терк жайгъандыла эмда къазауат этип жыйгъандыла. Заранлы тютюнден сакълагъан къапла кийип, жана тургъан мекямгъа киргендиле. Сора ол ажашхан адамланы табып, аланы тышына чыгъаргъандыла. 

Россейни МЧС-ини регион бёлюмюню келечиси Къазыланы Мухамед сабийлеге от бла ойнаргъа жарамагъаныны юсюнден, къыйын болумда не этерге кереклисин эмда терк болушлукъ этиу службаланы къалай  чакъырыргъа боллугъун ангылатханды.

Майданда энчи техниканы кёргюзтюу да къуралгъанды. Жашла анга  уллу сейир этип къарай эдиле. Кёплеге от ёчюлтюучю машинада олтурургъа онг берилгенди. Тюбешиуню ахырында  от ёчюлтюуню амаллары кёргюзтюлгендиле. Ол  а къараучулагъа кёп иги сезимле туудуртханды.

«Биз сабийлени хатадан сакълар ючюн къыйын болумлада тюз амалла этерге юйретирге кюрешебиз», - деп чертгенди 4-чю номерли от ёчюлтюу-къутхарыу бёлюмюню таматасыны орунбасары Къазыланы Мухамед.